अमरावती : अमरावती जिल्ह्यातील परतवाडा धारणी मार्गावर सेमाडोह जवळ खाजगी बस पुलावरुन थेट खाली कोसळून भीषण अपघात झाला आहे. या भीषण अपघातात 50 प्रवासी जखमी झाले असून, काही प्रवाशांची प्रकृती चिंताजनक आहे.
मिळालेल्या प्राथमिक माहितीनुसार, खासगी बस चालकाचा नियंत्रण सुटल्याने बस वळणावरुन घसरत पुलाखाली कोसळली, त्यामुळे अपघात झाला. अपघात इतका भीषण होता की, पुलाचा कठडा तोडून बस थेट दरीत कोसळली. तसेच, दरी खोल असल्याने या प्रवाशांना बाहेर काढणेही कठिण ठरत आहे. प्रवाशांना बसच्या खिडकीतून बाहेर काढण्याचा प्रयत्न केला जात आहे. तसेच. दरीत पाणी असल्याने बचावकार्य करण्यासही अडथळा येत आहे.
अपघातानंतर स्थानिक प्रशासनाने तातडीने मदतकार्य सुरु केले आहे. स्थानिक रहिवाशांनीदेखील मदतीचा हात पुढे केला आणि जखमींना प्राथमिक उपचारांसाठी पाठवण्यात आले आहे. पोलीसांनी घटनास्थळी धाव घेतली असून अपघाताचे कारण शोधण्यासाठी तपास सुरु केला आहे.
