पुणे : विवाहित महिलेला मोबाईल नंबर लिहिलेली चिठ्ठी देऊन तिच्याशी गैरवर्तन केले. एवढेच नव्हे तर वेळोवेळी तिचा चोरून पाठलाग केला. हा प्रकार १८ जानेवारी ते २० जानेवारी दरम्यान तसेच मागिल चार महिन्यांपासून खराडी येथील झेन्सार ग्राऊंड, रिलायन्स चौक तसेच परिसरातील एका शाळेजवळ घडला. याप्रकरणी चंदननगर पोलिसांनी एकाला अटक केली आहे.
याप्रकरणी वडगाव शेरी येथे राहणाऱ्या ३३ वर्षीय विवाहित महिलेने रविवारी (ता. २१) चंदननगर पोलीस ठाण्यात फिर्याद दिली आहे. यावरुन मोहम्मद सगीर मोहम्मद हुसेन सय्यद (वय ४०, रा. गुरुदत्त हौसिंग सोसायटी, तुकारामनगर, खराडी, पुणे) याच्यावर गुन्हा दाखल करुन अटक केली आहे.
याबाबत पोलिसांनी दिलेल्या माहितीनुसार, फिर्यादी महिला मुलांना शाळेतून आणण्यासाठी जात असताना आरोपीने त्यांचा चोरून पाठलाग केला. आरोपी मागील चार महिन्यांपासून महिलेचा पाठलाग करत आहे. तसेच त्यांच्याकडे वाईट नजरेने बघत होता.
दरम्यान, शनिवारी फिर्यादी महिला मुलांना शाळेतून आणण्यासाठी जात असताना आरोपीने त्यांचा पाठलाग केला. तसेच मोबाईल नंबर लिहिलेली चिठ्ठी फिर्यादी यांच्या हातात देऊन त्यांच्या स्त्री मनास लज्जा उत्पन्न होईल असे वर्तन केल्याचे फिर्यादीत नमूद केले आहे.
