उरुळी कांचन, (पुणे) : कोरेगाव मूळ (ता. हवेली) ग्रामपंचायत हद्दीत एका 32 वर्षीय विवाहित तरुणाने राहत्या घरात अज्ञात कारणावरुन छताच्या अँगलला साडीच्या सहाय्याने गळफास घेऊन आत्महत्या केल्याची घटना घडली आहे. ही घटना रविवारी (ता. 18) दुपारी एक वाजण्याच्या सुमारास इनामदारवस्ती येथील चिंतामणी हॉस्पिटलच्या पाठीमागे असलेल्या जेधे चाळ येथे घडली आली आहे.

सुरज दामोदर पवार (वय 32, रा. इनामदारवस्ती चिंतामणी हॉस्पिटलचे पाठीमागे जेधे चाळ, कोरेगावमुळ ता. हवेली) असे आत्महत्या केलेल्या तरुणाचे नाव आहे. याप्रकरणी पत्नी मयुरी सुरज पवार (वय 26, व्यवसाय, गृहिणी, रा. सदर) यांनी उरुळी कांचन पोलीस ठाण्यात खबर दिली आहे.
पोलिसांनी दिलेल्या माहितीनुसार, रविवारी खबर देणाऱ्या मयुरी व सुरज पवार या दोघांनी दुपारी एकत्र जेवण केले होते. तसेच घरात लहान मुलगी झोपली होती. त्यावेळी सुरज पवार हे लहान मुलीजवळ झोपतो म्हणून झोपायला गेले. घरातील काम उरकल्यानंतर मयुरी पवार या लहान मुलगी झोपलेल्या खोलीत गेल्या. यावेळी त्यांना त्यांचे पती सुरज पवार हे छताच्या अँगलला साडीने गळफास लावून लटकलेले दिसले.

मयुरी यांनी तात्काळ त्यांच्या आई, वडील व भावांना सदरची माहिती दिली आणि त्यांना बोलावून घेतले. तसेच सासु व सासरे यांना देखील फोन करून सांगितले. सदरची माहिती उरुळी कांचन पोलिसांना दिली असता सदर ठिकाणी पोलिसांनी पंचनामा करून पुढील कार्यवाही केली. सुरज पवार यांना तात्काळ उरुळी कांचन येथील प्राथमिक आरोग्य केंद्रात उपचारासाठी दाखल करण्यात आले. त्यावेळी उचारापुर्वीच त्यांचे निधन झाल्याचे वैद्यकीय अधिकाऱ्यांने घोषित केले. याप्रकरणी उरुळी कांचन पोलीस पुढील तपास करीत आहेत.







