दौंड : जुन्या वादातून एका 31 वर्षीय तरुणाची धारदार शस्त्राने वार करून हत्या केल्याची धक्कादायक घटना दौंड तालुक्यातील सोनवडी येथे घडली आहे. अरुण अनिल पवार असे मृत तरुणाचे नाव आहे. या प्रकरणी दौंड पोलिसांनी दिनेश विजय पवार (वय 20) आणि रुपेश मिथुन राठोड या दोघांना अटक केली आहे. घटनेमुळे परिसरात खळबळ उडाली आहे.

पोलिसांनी दिलेल्या माहितीनुसार, अरुण पवार आणि आरोपी दिनेश पवार यांचे कुटुंबीय नात्यातील आहेत. सुमारे 2 ते अडीच महिन्यांपूर्वी अरुण याच्याविरोधात दिनेशच्या आईने विनयभंगाची तक्रार दाखल केली होती. या घटनेपासून दिनेशच्या मनात अरुण याच्याबद्दल राग असल्याचा आरोप आहे.
16 नोव्हेंबरच्या रात्री अरुण आपल्या बहिणीच्या घरून सोनवडीतील स्वतःच्या घरी येण्यासाठी निघाला होता. मात्र, तो घरी पोहोचलाच नाही. दरम्यान, मध्यरात्रीनंतर कार्डलाइन ते पवार पॅलेस रस्त्यावर अरुण रक्ताच्या थारोळ्यात पडल्याची माहिती त्याच्या कुटुंबीयांना मिळाली.

माहिती मिळताच कुटुंबीय आणि नातेवाईक घटनास्थळी दाखल झाले. त्यावेळी अरुणची हालचाल होत नसल्याचे त्यांच्या लक्षात आले. पोलिसांनी दिलेल्या माहितीनुसार, दिनेश आणि रुपेश यांनी जुन्या वादातून अरुणला रस्त्यावर गाठून त्याच्या चेहऱ्यावर आणि डोक्यावर धारदार शस्त्राने वार केले. या हल्ल्यात गंभीर जखमी झालेल्या अरुणचा मृत्यू झाला.
या प्रकरणी मृताचा भाऊ सुनील पवार यांनी दिलेल्या तक्रारीवरून दौंड पोलीस ठाण्यात भारतीय न्याय संहिता कलम 103(1) आणि 3(5) अंतर्गत गुन्हा दाखल करण्यात आला आहे. दोन्ही संशयित आरोपींना अटक करण्यात आली असून पोलीस उपनिरीक्षक ए. एम. बिद्री पुढील तपास करत आहेत.






