राजु देवडे
लोणी धामणी, (पुणे) : धामणी (ता.आंबेगाव) येथील पहाडदरा, शिरदाळे तरूणांनी एकत्र येत राजगुरूनगर (खेड) येथे झालेल्या मनोज जरांगेंच्या मराठा आरक्षणाविषयी भूमिकेला पाठिंबा दर्शवला आहे. यासाठी धामणी ते राजगुरूनगर अशी दुचाकी रॅली काढत त्यांनी समर्थन केले आहे.
कुलदैवत कुलस्वामी म्हाळसाकांत खंडोबा मंदिरात तळी भंडारा करून दुचाकी रॅलीला सुरवात करण्यात आली. यावेळी ‘एक मराठा, लाख मराठा’ अशा घोषणा देण्यात आल्या. तसेच मनोज जरांगे पाटील यांच्या समर्थनार्थ घोषणा देण्यात आल्या. मराठा समाजाला आरक्षण मिळण्यासाठी कुलस्वामी म्हाळसाकांत खंडोबारायाला तरूणांनी यावेळी साकडे घातले.
दरम्यान, या तरूणांनी धामणी बाजारपेठेतून दुचाकी रॅली चौकात येताच ग्रामस्थांनी तिचे उत्स्फूर्तपणे स्वागत केले. त्यानंतर सर्व मराठा बांधव राजगुरूनगर या ठिकाणी सभेसाठी रवाना झाले. यावेळी अनेक मराठा बांधव, इतर समाज बांधव मोठ्या संख्येने उपस्थित होते.
