नवी दिल्ली: लोकसभा निवडणुकीचे राजकीय बिगुल वाजले आहे. निवडणुकीच्या पहिल्या टप्प्यातील मतदान 19 एप्रिलला होणार आहे. यावेळी देशात 7 टप्प्यात निवडणुका होणार आहेत. लोकसभा निवडणुकीचा निकाल 4 जूनला लागणार आहे. दरम्यान, सर्वच राजकीय पक्षांनी निवडणुकीची तयारी सुरू केली आहे. पहिल्या टप्प्यातील 102 जागांसाठी होणाऱ्या निवडणुकीसाठी उमेदवारी अर्ज भरण्याची प्रक्रियाही संपली आहे.
अर्ज दाखल केलेल्या उमेदवारांमध्ये काँग्रेसचे नकुल नाथ हे सर्वात श्रीमंत उमेदवार आहेत. छिंदवाडा येथील या काँग्रेस उमेदवाराने प्रतिज्ञापत्रात सुमारे 700 कोटी रुपयांची संपत्ती जाहीर केली आहे. 2019 च्या लोकसभा निवडणुकीत रमेश कुमार शर्मा हे अपक्ष उमेदवार होते. निवडणूक प्रतिज्ञापत्रानुसार शर्मा यांनी आपली संपत्ती 1107 कोटी रुपयांहून अधिक असल्याचे जाहीर केले होते.
रमेश कुमार शर्मा यांचे डिपॉझिट जप्त
रमेश कुमार शर्मा यांनी बिहारच्या पाटलीपुत्र जागेवरून अपक्ष उमेदवार म्हणून निवडणूक लढवली होती. शर्मा यांना निवडणुकीत पराभवाला सामोरे जावे लागले. त्यांना केवळ 1,558 मते मिळाली. त्यामुळे त्यांचे डिपॉझिटही जप्त झाले होते. या जागेवरून 26 उमेदवारांच्या यादीत ते चौथ्या क्रमांकावर होते.
गेल्या लोकसभा निवडणुकीत भारतीय जनता पक्षाचे (भाजप) राम कृपाल यादव यांनी ही जागा 5 लाख मतांनी जिंकली होती. शर्मा वगळता, गेल्या लोकसभेला पाच श्रीमंत उमेदवार हे काँग्रेसचे होते. यापैकी तीन जणांनी निवडणुका जिंकल्या, तर उर्वरितांना पराभवाला सामोरे जावे लागले होते.
2019 च्या निवडणुकीत दुसरे सर्वात श्रीमंत उमेदवार कोंडा विश्वेश्वर रेड्डी होते, त्यांची संपत्ती 895 कोटी रुपये होती. तेलंगणातील चेवेल्ला मतदारसंघातून तेलंगणा राष्ट्र समितीचे (टीआरएस) उमेदवार जी रंजीत रेड्डी यांनी त्यांचा पराभव केला. त्याच वेळी, नकुलनाथ हे 2019 मधील तिसऱ्या क्रमांकाचे श्रीमंत उमेदवार होते. त्यावेळी नकुलनाथ यांनी आपली संपत्ती 660 कोटी रुपये असल्याचे जाहीर केले होते.
ज्योतिरादित्य सिंधिया हे देखील श्रीमंत उमेदवारांच्या यादीत होते
वसंतकुमार एच हे 2019 च्या चौथ्या क्रमांकाचे श्रीमंत उमेदवार होते. निवडणूक प्रतिज्ञापत्रात त्यांनी आपली संपत्ती 417 कोटींहून अधिक असल्याचे जाहीर केले होते. वसंतकुमार तामिळनाडूच्या कन्याकुमारी मतदारसंघातून सुमारे तीन लाख मतांनी विजयी झाले होते. निवडणुकीतील पाचवे आणि सर्वात श्रीमंत उमेदवार काँग्रेसचे ज्योतिरादित्य सिंधिया होते, ज्यांनी 374 कोटी रुपयांपेक्षा जास्त संपत्ती जाहीर केली होती.
