केडगाव, (पुणे) : ऑनलाइन आर्थिक फसवणुकीला आळा घालण्यासाठी सातत्याने जनजागृती, प्रबोधन केले जाते. त्याचे सकारात्मक परिणाम होत असताना सायबर भामटे मात्र ऑनलाइन फसवणुकीसाठी नवनवीन फंड्यांचा वापर करीत आहेत. दौंड तालुक्यात तर थेट स्मार्ट फोन वापरणाऱ्यास वारंवार ओळखीच्या प्रतिष्ठित व्यक्तींची ओळख सांगून फोनवर ओटीपी (टेक्स्ट एसएमएस) पाठवून गंडा घालण्याचा प्रकार सुरू केला आहे.
जर समोरील व्यक्तीने माहिती देण्यास टाळाटाळ केली तर शिवीगाळ देखील केली जाते. फोनवर वारंवार बोलण्यात गुंतवून आपला फोन हॅक केला जातो. क्षणात आपल्या नंबरवर अनेक ओटीपी येतात. असे प्रकार दौंड तालुक्यातील खुटबाव, देलवडी, केडगाव, पिंपळगाव, नाथचीवाडी अशा अनेक गावात घडू लागले आहेत . सायबर चोरट्यांकडून हा एक प्रकारचा नवीन डाव आखला जात आहे ज्यामध्ये ऑनलाइन फसवणूक, डेटा चोरी, सिस्टम हॅकिंग आणि खंडणी यासारख्या गुन्हेगारी कृतींचा समावेश आहे. सायबर गुन्हेगार वापरकर्त्यांची गोपनीय माहिती चोरण्यासाठी आणि त्याचा गैरवापर करण्यासाठी ही नवीन पद्धत वापरली जात आहे.
भारतात डिजिटल विकास जितक्या वेगाने होत आहे, तितक्याच वेगाने सायबर फसवणुकीची प्रकरणेही समोर येत आहेत. इंटरनेट, ऑनलाइन व्यवहार आणि डिजिटल साक्षरतेचा अभाव यामुळे सायबर गुन्हेगार अधिक सक्रिय झाले आहेत. अनोळखी नंबर वरून फोन कॉल येतात व आपल्या गावातील एखाद्या व्यक्तीचे नाव सांगून आपल्याशी परिचय वाढविण्याचा प्रयत्न केला जातो. त्याच बरोबर आपली माहिती विचारली जाते. अनेक प्रकार दौंड तालुक्यातील ग्रामीण भागात देखील घडू लागले आहेत.
यवत पोलिसांकडून तक्रार घेण्यास टाळाटाळ..
मागील दोन दिवसापासून 9075567127,तसेच 9075567002 अशा नंबर वरून फोन कॉल येत असून अनेक गावातील लोकांना अश्लील शिवीगाळ केली जात आहे. या संदर्भात तक्रारदार पोलीस स्टेशन येथे गेले असता आपण असे फोन उचलू नका, हे नंबर ब्लॉक लिस्ट ला टाका, इंटरनेट बंद ठेवा, मोबाईल बंद ठेवा,असे उत्तरे दिली जातात. तर सायबर क्राईम हेल्पलाईन नंबर 1930 वर संपर्क केला असता आपले पैसे गेले असतील तर आम्ही आपली तक्रार दाखल करू शकतो अन्यथा आम्ही काहीच करू शकत नाही. असे उत्तर मिळत आहे. त्यामुळे नुकसान झाल्यानंतर काय उपयोग असा प्रश्न यानिमित्त नागरिक करीत आहेत.
याबाबत बोलताना देलवाडी (ता. दौंड) येथील राजेंद्र अडागळे म्हणाले, “माझे नाव सांगून गावातील एका प्रतिष्ठित व्यक्ती यांना फोन करून सांगितले की यांना लोन भरायला सांगा अन्यथा तुम्हाला पाहून घेतो म्हणत शिवीगाळ केली. हा प्रकार गुरुवारी (त. 15) घडला व तसाच कॉल दुसऱ्या दिवशी शुक्रवारी सकळी देखील आला अन् फोन कॉल येताच क्षणात अनेक ओटीपी येऊ लागले. यातून कुठलीही आर्थिक हानी होऊ नये यासाठी पोलिस प्रशासनाने 9075567127 व 9075567002 या नंबर चे लोकेशन शोधून संबंधितांना लवकरात लवकर अटक करावी.
