मुंबई : आयपीएस अधिकारी सुधाकर पठारे यांचे आज (दि. 29) अपघाती निधन झाले आहे. तेलंगणामध्ये श्रीशैलम येथून पठारे नागरकुरलूनकडे जात असताना त्यांच्या कारचा अपघात झाला. या अपघातात त्यांचा जागीच मृत्यू झाला आहे. ज्या गाडीतून सुधाकर पठारे हे प्रवास करत होते, त्या चारचाकी गाडीला ट्रकची जोरदार धडक बसल्याने हा अपघात झाला. पठारे हे 2011 बॅचचे आयपीएस अधिकारी आहेत. त्यांच्या अपघाती निधनामुळे महाराष्ट्र पोलिस दलावर शोककळा पसरली आहे.
आयपीएस अधिकारी असलेले सुधाकर पठारे सध्या मुंबई पोलिसमध्ये पोर्ट झोनचे डीसीपी म्हणून कार्यरत होते. पठारे हे प्रशिक्षणासाठी हैदराबादमध्ये गेले होते. त्या ठिकाणी ते त्यांच्या एका नातेवाईकासह ज्योतिर्लिंगाच्या दर्शनासाठी निघाले असताना हा अपघात झाला. सदर अपघातात सुधाकर पठारे यांच्यासोबत त्यांच्या नातेवाईकाचा देखील मृत्यू झाला आहे. दरम्यान, या अपघाताची माहिती तेलंगणा पोलिसांना मुंबई पोलिसांना दिल आहे.
कोण होते सुधाकर पठारे?
आयपीएस सुधाकर पठारे हे मूळचे अहमदनगर जिल्ह्यातील वाळवणे (ता. पारनेर) येथील रहिवासी होते. पठारे यांनी एमएस्सी (कृषी) आणि एलएलबीपर्यंत शिक्षण घेतले. तसेच स्पर्धा परीक्षांद्वारे 1995 मध्ये जिल्हा विशेष लेखा परीक्षक, 1996 मध्ये विक्रीकर अधिकारी आणि 1998 मध्ये पोलिस उपअधीक्षक म्हणून आपल्या करिअरला सुरुवात केली.
पठारे पंढरपूर, अकलूज, कोल्हापूर, राजुरा याठिकाणी पोलिस उपअधीक्षक, तर चंद्रपूर, वसई येथे अप्पर पोलिस अधीक्षक म्हणून काम पाहिले होते. सीआयडी अमरावतीचे पोलिस अधीक्षक आणि मुंबई, ठाणे, पुणे आणि नवी मुंबईत पोलिस उपायुक्त म्हणून त्यांनी सेवा बजावली होती.
पठारे यांनी संघटित गुन्हेगारीविरुद्ध मोक्का, तडीपारी, एमपीडीएअंतर्गत कठोर कारवाया केल्या आणि कायदा-सुव्यवस्था राखण्यासाठी अनेक उपक्रम हाती घेतले. त्यांच्या अपघाती निधनाने पोलिस खात्यातील एक कर्तव्यनिष्ठ अधिकारी गमावल्याची भावना सर्वत्र व्यक्त होत आहे.
