पुणे, ता. 29 : 4 कोटी रुपयांच्या ऑनलाईन फसवणुकीच्या गुन्ह्यातील पुण्यातील आरोपी मिलिंद भारत बासटवार यास केरळच्या त्रिशूर येथील मुख्य न्यायदंडाधिकारी राम्या मेनन यांनी जामीन मंजूर केला आहे. आरोपीने व्हाट्सअॅपवर स्नेहा नावाने तक्रारदाराशी संपर्क साधून स्वतःला अपवर्क डिजिटल मार्केटिंग कंपनीचा मालक असल्याचे भासवले होते.
आरोपीने तक्रारदारास ऑनलाइन काम करून पैसे कमविण्याचा दावा केला व त्यावर विश्वास बसवून तक्रारदाराकडून 19 एप्रिल 2024 ते 3 मे 2024 या कालावधीत विविध बँक खात्यांमध्ये मोठ्या प्रमाणात रक्कम जमा करून घेतली. यात तक्रारदाराच्या गुरुवायूर शाखेतील कॅनरा बँक, मलप्पाराम कल्पकमचेरी शाखा आणि तिच्या पतीच्या चावक्कड शाखेतील कॅनरा बँक यांचा समावेश होता. तक्रारदाराने एकूण 22 लाख रुपये ट्रान्सफर केले होते, मात्र नफा किंवा पैसे परत न दिल्यामुळे त्रिशूर सायबर पोलीस ठाण्यात फसवणुकीची तक्रार दाखल करण्यात आली.
तपासादरम्यान पुण्यातून आरोपीस अटक करून त्रिशूर न्यायालयात हजर करण्यात आले होते. त्यानंतर आरोपीची रवानगी त्रिशूर जिल्हा कारागृहात करण्यात आली. कारागृहात असतानाच आरोपीने अॅड. नितीन भालेराव यांच्यामार्फत जामीन अर्ज दाखल केला. त्यात त्याने पोलिसांनी कोणतीही पूर्वसूचना न देता बेकायदेशीरपणे अटक केल्याचा युक्तिवाद केला. सरकार पक्षातर्फे व्हाट्सअॅप नोटीसेचा उल्लेख करण्यात आला, मात्र आरोपी पक्षाने व्हाट्सअॅप नोटीस देणे कायदेशीर नसल्याचे सांगत सर्वोच्च न्यायालयाच्या निकालांचा दाखला दिला.
दरम्यान, दोन्ही पक्षांचा युक्तिवाद ऐकल्यानंतर त्रिशूर येथील मुख्य न्यायदंडाधिकारी राम्या मेनन यांनी आरोपीची अटक बेकायदेशीर असल्याचा निर्णय देत जामीन मंजूर केला. अशी माहिती आरोपीचे वकील अॅड. नितीन भालेराव यांनी दिली.
