पुणे : पुणे आंतरराष्ट्रीय विमानतळावर अमली पदार्थांच्या तस्करीचा मोठा प्रकार उघडकीस आला आहे. बँकॉकहून आलेल्या एका भारतीय प्रवाशाच्या सामानातून तब्बल 3 कोटी 72 लाख रुपये किमतीचा हायड्रोपोनिक गांजा जप्त करण्यात आला. विशेष म्हणजे, हा गांजा लपवण्यासाठी नूडल्स आणि सुकामेव्याच्या पाकिटांचा वापर करण्यात आला होता. कस्टम विभागाच्या एअर इंटेलिजन्स युनिटने ही कारवाई केली असून संबंधित प्रवाशाला अटक करण्यात आली आहे.
ही घटना 4 नोव्हेंबर रोजी घडली. एअर इंडिया एक्स्प्रेसच्या IX-291 या विमानातून एक भारतीय प्रवासी बँकॉकहून पुण्यात दाखल झाला होता. विमानतळावर त्याच्या हालचाली संशयास्पद वाटल्याने कस्टम अधिकाऱ्यांनी त्याच्या ट्रॉली बॅगेची तपासणी करण्याचा निर्णय घेतला.
सुरुवातीला बॅगेत नूडल्सची पाकिटे आणि ‘फ्रीज ड्राय मंथोंग ड्युरियन’ नावाने असलेली सुकामेव्याची 9 पाकिटे आढळली. मात्र, या पाकिटांची बारकाईने तपासणी केली असता त्यामध्ये काहीतरी वेगळेच दडवण्यात आल्याचे समोर आले. खाद्यपदार्थांच्या पाकिटांमध्ये काळ्या प्लास्टिकचे दोन थर लावून त्यात व्हॅक्यूम सील केलेल्या पिशव्या लपवण्यात आल्या होत्या.
या पिशव्यांमध्ये पिवळसर-हिरव्या रंगाच्या वाळलेल्या फुलांच्या कळ्या आढळल्या. त्यानंतर कस्टम अधिकाऱ्यांनी अमली पदार्थ तपासणी किटच्या मदतीने त्यांची चाचणी केली. त्यातून हा पदार्थ हायड्रोपोनिक गांजा असल्याचे स्पष्ट झाले.
या कारवाईत एकूण 10.642 किलो गांजा आणि तस्करीसाठी वापरलेले पॅकिंग साहित्य जप्त करण्यात आले. आंतरराष्ट्रीय बाजारात या गांजाची किंमत सुमारे 3 कोटी 72 लाख रुपये असल्याचे सांगण्यात आले आहे. याप्रकरणी प्रवाशाला अटक करून न्यायालयात हजर करण्यात आले. न्यायालयाने त्याला 18 नोव्हेंबरपर्यंत न्यायालयीन कोठडी सुनावली आहे. कस्टम विभागाचे पोलीस उपायुक्त धीरज मोरे यांच्या मार्गदर्शनाखाली ही कारवाई करण्यात आली.
