Mumbai Accident News : मुंबईत पश्चिम उपनगरातील अंधेरीच्या मालपा डोंगरी परिसरात असलेल्या पेपर बॉक्स कंपनीसमोरील रस्त्यावर एक भीषण अपघात झाला आहे. भरधाव वेगात आलेल्या डंपरने मुलीला चिरडल्याची धक्कादायक घटना घडली आहे. आठ डिसेंबरला सायंकाळी ७ वाजण्याच्या सुमारास हा अपघात झाला आहे. या घटनेने परिसरात एकच खळबळ उडाली.
असा घडला अपघात?
मालपा डोंगरी परिसरात असलेल्या पेपर बॉक्स कंपनी समोरील रस्त्यावरून एक लहान मुलगी पायी चालत होती. भरधाव वेगात आलेल्या डंपरने त्या लहान मुलीला जोरदार धडक दिली. या धडकेत मुलगी रस्त्यावर पडली. यामुळे तिच्या हात आणि पायावरून डंपरच चाक गेल्याने ती गंभीर जखमी झाली आहे. रस्त्यावरील आणि स्थानिक नागरिकांनी मुलीला डंपरच्या चाकाखालून काढून ताबडतोब मुंबईच्या जोगेश्वरी येथील ड्रामा केअर रुग्णालयात उपचारासाठी दाखल करण्यात आलं आहे.
अपघातानंतर चालकाने काढला पळ
दरम्यान, भरधाव वेगात चालवणारा डंपर चालक पळून जात असतानाच नागरिकांनी त्याला पकडून एमआयडीसी पोलिसांच्या ताब्यात दिलं. पोलिसांनी याप्रकरणी गुन्हा दाखल करून चालकाला अटक केली आहे.
