पुणे: सहायक प्राध्यापक पदासाठी आयोजित करण्यात येणाऱ्या राज्य पात्रता परीक्षा (सेट) संदर्भात समाजमाध्यमांवर फिरणाऱ्या खोट्या माहितीकडे सावित्रीबाई फुले पुणे विद्यापीठाच्या सेट परीक्षा विभागाने गांभीर्याने दखल घेतली आहे. परीक्षेबाबत चुकीची माहिती देणाऱ्या युट्यूब व्हिडिओ आणि सोशल मीडियावरील मेसेजमुळे उमेदवारांमध्ये संभ्रमाचे वातावरण निर्माण झाले असून, विद्यापीठाने तात्काळ यावर कारवाई करत सायबर पोलिसांकडे तक्रार दाखल केली आहे.
विद्यापीठाने प्रसिद्धिपत्रकाद्वारे सांगितले की, सेट परीक्षेची प्रश्नपत्रिका फुटली आहे आणि ती मिळवण्यासाठी संपर्क साधावा, असा खोटा प्रचार एका युट्यूब चॅनेलवरून करण्यात येत आहे. तसेच या व्हिडिओमध्ये प्रश्नपत्रिका मिळाल्याचा दावा करणारी श्राव्यफीत (ऑडिओ क्लिप) समाजमाध्यमांवर व्हायरल झाली आहे. या खोट्या प्रचारामुळे परीक्षार्थींमध्ये गैरसमज आणि चिंता निर्माण झाली आहे.
ही बाब गंभीर असल्यामुळे पुणे विद्यापीठाच्या सेट परीक्षा विभागाने बुधवारी रात्रीच पुणे सायबर पोलीस ठाण्यात या प्रकरणाची अधिकृत तक्रार दाखल केली आहे. याप्रकरणी सखोल चौकशी सुरू असून, खोट्या माहितीचा प्रसार करणाऱ्यांवर कडक कारवाई करण्यात येणार असल्याचे विद्यापीठाने स्पष्ट केले आहे.
सेट परीक्षा संदर्भात अधिकृत माहिती फक्त विद्यापीठाच्या संकेतस्थळावरून व अधिकृत सूचनांमधूनच मिळवावी, असे आवाहनही विभागातर्फे करण्यात आले आहे. अशा कोणत्याही अफवांवर विश्वास ठेवू नये आणि गैरप्रकारांच्या भूलथापांना बळी पडू नये, असे विद्यापीठाने स्पष्ट केले.
आगामी ४० वी सेट परीक्षा येत्या १५ जून २०२५ रोजी महाराष्ट्र व गोवा राज्यातील १८ प्रमुख शहरांतील विविध परीक्षा केंद्रांवर पार पडणार आहे. ही परीक्षा विद्यापीठ अनुदान आयोगाच्या मार्गदर्शक तत्वांनुसार घेतली जात असून, तिच्या पारदर्शकतेसाठी विद्यापीठ संपूर्ण दक्षता घेत आहे.
