Funsungi fraud फुरसुंगी, ता. २२ : घरातील फर्निचरचे काम करून देण्याचे आमिष दाखवत तब्बल १ लाख ५३ हजार रुपये उकळून काम न करता टाळाटाळ करणाऱ्या आरोपीचा भंडाफोड फुरसुंगी परिसरात झाला आहे. ऑनलाईन संपर्कातून विश्वास संपादन करून ‘कंपनीतून काम करतो’ असा बनाव करत या फसवणुकीचा डाव रचल्याने परिसरात खळबळ उडाली आहे. या प्रकरणी फुरसुंगी पोलीस ठाण्यात गुन्हा दाखल करण्यात आला आहे. Funsungi fraud
याप्रकरणी पूजा कृष्णा बागल (वय ३४, रा. कुमार पार्क इन्फिनिया, फुरसुंगी) यांनी फुरसुंगी पोलीस ठाण्यात फिर्याद दिली आहे. त्यानुसार मोहसीन हनीफ शेख (रा. भवानी पेठ, पुणे) याच्यावर गुन्हा दाखल करण्यात आला आहे. पोलिसांनी दिलेल्या माहितीनुसार, फिर्यादी पूजा बागल यांनी नोव्हेंबर २०२५ मध्ये घरातील फर्निचरचे काम करण्यासाठी ऑनलाईन शोध घेतला. त्यावेळी मोहसीन हनीफ शेख (रा. भवानी पेठ, पुणे) याच्याशी संपर्क आला. आरोपीने स्वतःला अनुभवी फर्निचर कंत्राटदार असल्याचे सांगत पुण्यातील विविध कामांचे फोटो दाखवून विश्वास संपादन केला. Funsungi fraud
यानंतर आरोपीने फिर्यादी व त्यांच्या पतींना पिसोळी येथील एका फर्निचर युनिटमध्ये नेऊन ओळख करून दिली. “डायरेक्ट कंपनीतून फर्निचर तयार करून देतो, त्यामुळे खर्च कमी होईल आणि १० ते १२ दिवसांत काम पूर्ण होईल,” असे आश्वासन देण्यात आले. त्यानुसार ‘पॉश लिव्हिंग इंटेरियर’ या नावाने १ लाख ८० हजार रुपयांचे कोटेशन पाठवण्यात आले. आरोपीच्या बोलण्यावर विश्वास ठेवून फिर्यादींनी सुरुवातीला १५ हजार रुपये अॅडव्हान्स दिले. त्यानंतर विविध कारणे सांगत आरोपीने वेळोवेळी पैशांची मागणी केली. गुगल पेच्या माध्यमातून २५ हजार, ५० हजार, १० हजार, ३८ हजार, ५ हजार आणि १० हजार असे एकूण १ लाख ५३ हजार रुपये आरोपीला देण्यात आले. Funsungi fraud
दरम्यान, आरोपीने काम सुरू असल्याचे भासवण्यासाठी काही साहित्य घरात आणून ठेवले. मात्र त्यानंतर कामाची कोणतीही प्रगती झाली नाही. “लवकरच काम पूर्ण करतो” असे सांगत तो वारंवार टाळाटाळ करत राहिला. फर्निचरचे काम पूर्ण होत नसल्याने फिर्यादींना संशय आला. त्यांनी आरोपीकडे काम पूर्ण करण्याची किंवा पैसे परत देण्याची मागणी केली. मात्र आरोपीने ना काम केले, ना पैसे परत केले. उलट विविध कारणे देत तो संपर्क टाळू लागला. आपली फसवणूक झाल्याची खात्री झाल्यानंतर फिर्यादींनी फुरसुंगी पोलीस ठाण्यात धाव घेत तक्रार दाखल केली. त्यानुसार आरोपी मोहसीन हनीफ शेख याच्याविरुद्ध भारतीय न्याय संहिता (BNS) २०२३ मधील कलम ३१६(२) अन्वये गुन्हा दाखल करण्यात आला आहे. Funsungi fraud
