Fursungi News फुरसुंगी, ता. 22 : न्यायालयाच्या आदेशानंतर सीलबंद करण्यात आलेल्या घराचे कुलूप तोडून कर्जदारांनी पुन्हा बेकायदेशीररीत्या ताबा घेतल्याची धक्कादायक घटना फुरसुंगी परिसरात उघडकीस आली आहे. या प्रकारामुळे न्यायालयीन प्रक्रियेचा उघड अवमान झाल्याचे समोर आले असून, संबंधित दाम्पत्याविरुद्ध फुरसुंगी पोलीस ठाण्यात गुन्हा दाखल करण्यात आला आहे. Fursungi News
भागीरथी सुधाकर मटके व सहकर्जदार सुधाकर अण्णाराव मटके (रा. फुरसुंगी) अशी गुन्हा दाखल करण्यात आलेल्यांची नावे आहेत. याप्रकरणी सदाम हुसेन चौहान (वय ३३, रा. खराडी) यांनी फुरसुंगी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी चौहान हे आधार हौसिंग फायनान्स लिमिटेड या कंपनीत रिजनल कलेक्शन मॅनेजर म्हणून कार्यरत आहेत. भागीरथी मटके व सहकर्जदार सुधाकर मटके यांनी १९ मार्च २०१८ रोजी सुमारे १६ लाख ७२ हजार ३०३ रुपयांचे गृहकर्ज घेतले होते. सुरुवातीला काही काळ हप्ते भरल्यानंतर नोव्हेंबर २०२१ पासून त्यांनी कर्जफेड थांबवली. त्यामुळे संबंधित खाते ‘एनपीए’मध्ये गेले. Fursungi News
यानंतर कंपनीकडून सरफेसी कायद्यानुसार कारवाई करत वारंवार नोटिसा देण्यात आल्या. तसेच ही नोटीस वर्तमानपत्रांत प्रसिद्ध करण्यात आली होती. तरीही कर्जदारांनी कोणतीही दखल घेतली नाही. अखेर जिल्हा दंडाधिकाऱ्यांच्या आदेशानुसार मालमत्तेचा ताबा घेण्याची प्रक्रिया राबवण्यात आली. न्यायालयीन आदेशानुसार संबंधित फ्लॅटचा लिलाव करण्यात आला असून, तो शुभम दशरथ माने (रा. भेकराईनगर) यांनी १५ एप्रिल २०२६ रोजी खरेदी केला. त्यानंतर २० एप्रिल रोजी अधिकृत पथकाने पोलीस बंदोबस्तात मालमत्ता ताब्यात घेऊन सीलबंद केली. मुख्य दरवाजावर नोटीस व कंपनीचा बोर्ड लावण्यात आला होता. Fursungi News
मात्र, याच दिवशी सायंकाळी कर्जदारांनी सीलबंद दरवाजाचे कुलूप तोडून नोटीस काढून टाकली आणि कुटुंबासह घरात पुन्हा प्रवेश केला. लिलाव प्रक्रियेनंतरही मालमत्तेवर जबरदस्तीने ताबा मिळवण्याचा हा प्रकार उघड झाल्याने खळबळ उडाली आहे. या घटनेनंतर फिर्यादीने स्वतः घटनास्थळी जाऊन पाहणी केली असता प्रकार उघडकीस आला. कंपनीच्या अधिकाऱ्यांनी तात्काळ याबाबत पोलिसांत तक्रार दिली. त्यानुसार कर्जदार दाम्पत्याविरुद्ध भारतीय न्याय संहिता (BNS) २०२३ मधील कलम २२३, २४४, ३(५), ३२४(२) व ३२९(३) अन्वये गुन्हा दाखल करण्यात आला आहे. या प्रकरणाचा पुढील तपास फुरसुंगी पोलीस ठाण्याचे पोलीस उपनिरीक्षक निवृत्ती माने करत आहेत. Fursungi News
