अक्षय टेमगिरे
शिक्रापूर : सोशल मीडियावर खोटी ओळख निर्माण करून एका अल्पवयीन मुलीला प्रेमाच्या जाळ्यात ओढणे, तिचा विश्वास संपादन करून व्हिडिओ कॉलवर अश्लील कृत्य करण्यास भाग पाडणे आणि त्याचे स्क्रीन रेकॉर्डिंग करून बदनामीची धमकी देत मानसिक छळ केल्याप्रकरणी शिक्रापूर पोलिसांनी एका अल्पवयीन मुलाविरुद्ध भारतीय न्याय संहिता बीएनएस माहिती तंत्रज्ञान अधिनियम, पॉक्सो कायदा तसेच अनुसूचित जाती-जमाती अत्याचार प्रतिबंधक कायद्यांतर्गत गंभीर गुन्हा दाखल केला आहे. याप्रकरणी पीडित अल्पवयीन मुलीच्या फिर्यादीवरून शिक्रापूर पोलीस स्टेशन येथे गुन्हा दाखल करण्यात आला आहे.
या गुन्ह्यात भारतीय न्याय संहिता मधील माहिती तंत्रज्ञान अधिनियम बालकांचे लैंगिक अपराधांपासून संरक्षण पॉक्सो तसेच अनुसूचित जाती व अनुसूचित जमाती अत्याचार प्रतिबंध अधिनियम मधील संबंधित कलमांचा समावेश करण्यात आला आहे.
पोलिसांनी दिलेल्या माहितीनुसार, आरोपीने सोशल मीडियावर खोटी ओळख तयार करून पीडित मुलीशी मैत्री केली. प्रेमाचे आमिष दाखवत तिचा विश्वास संपादन केल्यानंतर वारंवार व्हिडिओ कॉल करून तिला अश्लील कृत्य करण्यास भाग पाडले होते.
त्याचवेळी संपूर्ण प्रकाराचे स्क्रीन रेकॉर्डिंग करून ते स्वतःच्या मोबाईलमध्ये जतन केले. त्यानंतर संबंधित व्हिडिओ सोशल मीडियावर व्हायरल करण्याची तसेच आई-वडील व नातेवाईकांना पाठवून बदनामी करण्याची धमकी देत आरोपीने पीडितेचा सातत्याने मानसिक छळ केल्याचे फिर्यादीत नमूद करण्यात आले आहे.
तपासादरम्यान आरोपी आणि फिर्यादी दोघेही अल्पवयीन असल्याचे निष्पन्न झाले असुन आरोपी हा विधीसंघर्षित बालक असल्याने त्याला ताब्यात घेऊन बालन्याय मंडळासमोर हजर करण्यात आले असून पुढील तपास सुरू आहे.
ही कारवाई पोलीस अधीक्षक संदीप सिंह गिल, अपर पोलीस अधीक्षक शुभम कुमार, उपविभागीय पोलीस अधिकारी अमोल मांडवे यांच्या मार्गदर्शनाखाली पोलीस निरीक्षक चंद्रशेखर यादव, सहायक पोलीस निरीक्षक शिवाजी भोसले, सहायक पोलीस निरीक्षक हणमंतराव गिरी तसेच शिक्रापूर पोलीस स्टेशनच्या पथकाने केली आहे. या गुन्ह्याचा पुढील तपास उपविभागीय पोलीस अधिकारी अमोल मांडवे करीत आहेत.
पोलीसांचे नागरिकांना आवाहन
सोशल मीडियावर अनोळखी व्यक्तींशी संपर्क साधताना विशेष खबरदारी घ्यावी. कोणत्याही प्रकारच्या ऑनलाइन ब्लॅकमेलिंग, धमकी किंवा अश्लील कृत्यांसाठी दबाव टाकला जात असल्यास त्वरित जवळच्या पोलीस ठाण्यात तक्रार नोंदवावी. तक्रारदाराची ओळख गोपनीय ठेवण्यात येईल, असे आवाहन शिक्रापूर पोलिस स्टेशनचे पोलीस निरीक्षक चंद्रशेखर यादव यांनी केले आहे.
