अक्षय टेमगिरे
शिक्रापूर : शिरूर तालुक्यातील सणसवाडी येथील झेनिथ बायोकेमिकल इंडस्ट्रीज प्रा. लि. कंपनीतून तब्बल ८०० लिटर डिझेलची चोरी करून पुरावे नष्ट करण्यासाठी त्याच बॅरलमध्ये पाणी भरून ठेवणाऱ्या दोन सराईत चोरट्यांना शिक्रापूर पोलिसांनी अटक करत गुन्ह्याचा यशस्वी छडा लावला आहे.
या चोरीमुळे कंपनीचे सुमारे ७२ हजार रुपयांचे नुकसान झाले असुन पोलिसांनी दिलेल्या माहितीनुसार दि. २ जून ते १० जुलै २०२६ या कालावधीत सणसवाडी येथील झेनिथ बायोकेमिकल इंडस्ट्रीज कंपनीच्या जनरेटरजवळ ठेवलेल्या बॅरलमधील ८०० लिटर डिझेल अज्ञात चोरट्यांनी चोरून नेले होते. चोरीचा संशय येऊ नये म्हणून आरोपींनी रिकाम्या बॅरलमध्ये पाणी भरून ठेवत कंपनीची दिशाभूल करण्याचा प्रयत्न केला.
याप्रकरणी शिक्रापूर पोलीस ठाण्यात गुन्हा दाखल करण्यात आला आहे. गुन्ह्याचे गांभीर्य लक्षात घेऊन पोलीस निरीक्षक चंद्रशेखर यादव यांनी तपासाची सूत्रे हाती घेत गोपनीय माहितीच्या आधारे पोलिसांनी अक्षय प्रेमचंद देवडे रा. शिक्रापूर आणि अविनाश शंकर धुमाळ रा. रांजणगाव यांना ताब्यात घेऊन केलेल्या चौकशीत दोघांनीही डिझेल चोरीची कबुली दिली आहे.
तपासादरम्यान आरोपी हे सराईत गुन्हेगार असल्याचे उघड झाले असून आरोपी अक्षय देवडे याच्यावर यापूर्वी चोरीचे गुन्हे दाखल आहेत तर अविनाश धुमाळ याच्यावर दरोड्यासह गंभीर स्वरूपाचे गुन्हे नोंद असल्याची माहिती पोलिसांनी दिली आहे. चोरीस गेलेले डिझेल हस्तगत करण्याची प्रक्रिया सुरू असून या दोघांकडून आणखी अशाच प्रकारचे गुन्हे उघडकीस येण्याची शक्यता पोलिसांनी व्यक्त केली आहे.
ही उल्लेखनीय कारवाई पुणे ग्रामीणचे पोलीस अधीक्षक संदीपसिंह गिल्ल व अपर पोलीस अधीक्षक डॉ. शुभम कुमार यांच्या मार्गदर्शनाखाली पोलीस निरीक्षक चंद्रशेखर यादव,पोलीस उपनिरीक्षक उमाकांत कुंजीर, पोलीस हवालदार रोहीदास पारखे, नारायण मळेकर, श्रीमंत होनमाने, अमोल दांडगे, शिवाजी चितारे, राकेश मळेकर, नारायण वाळके आणि मच्छिंद्र निचीत यांनी केली आहे.
