ऋषभ परदेसी
राशीन : राशीन (ता. कर्जत) येथील श्री जगदंबा देवस्थानच्या जमिनीतील मुरूम चोरीच्या प्रकरणाने आता गंभीर वळण घेतले आहे. देवस्थानच्या गट क्रमांक १४५८/१ मध्ये मुरूम उत्खनन केल्याच्या खुणा महसूल विभागाच्या पाहणीत आढळून आल्याने प्रशासनाने घटनास्थळी पंचनामा केला आहे. त्यामुळे देवस्थानच्या जमिनीवर सुरू असलेल्या कथित मुरूम उत्खननाला महसूल विभागाने दणका दिला असून, आता मुरूम नेमका किती काढला गेला आणि त्यामागे कोणाचा हात आहे, याकडे ग्रामस्थांचे लक्ष लागले आहे.
महसूल विभागाच्या पाहणीदरम्यान उत्खननाच्या खुणा आढळल्यानंतर मंडल अधिकारी विश्वास राठोड आणि तलाठी यांनी पंचनामा केला. आता ईटीएस मोजमाप करण्यात आल्यानंतर प्रत्यक्षात किती क्षेत्रात आणि किती प्रमाणात मुरूम उत्खनन झाले, याचे चित्र स्पष्ट होणार आहे.
देवस्थानच्या जमिनीला हात घालण्याचे धाडस नेमके कोणी केले, याचा शोध घेणे आता महसूल प्रशासनासमोरचे मोठे आव्हान आहे. पंचनामा करून कारवाई थांबण्याऐवजी उत्खनन करणारे, मुरूम वाहून नेणारे आणि त्यामागील सूत्रधार कोण आहेत, याचा सखोल तपास करून दोषींवर कठोर महसुली तसेच फौजदारी कारवाई करण्याची मागणी जोर धरू लागली आहे.
दरम्यान, या प्रकरणाबाबत तक्रारदार गुरव पुजारी सुनील देविदास रेणुकर तसेच रिपब्लिकन पार्टी ऑफ इंडिया (आठवले गट)चे जिल्हा उपाध्यक्ष रवींद्र भाऊ दामोदिरे यांनी डिजिटल सोशल मीडियाच्या माध्यमातून आक्रमक भूमिका घेतली आहे.
देवस्थानच्या मालमत्तेचे संरक्षण करणे ही प्रशासनाची जबाबदारी असून, अशा प्रकारे बेकायदेशीर उत्खनन होत असल्यास संबंधितांवर कारवाई होणे आवश्यक आहे. त्यामुळे पंचनामा झाला, आता ईटीएस मोजमापानंतर कारवाईचा धडाका कधी? असा सवाल नागरिकांकडून उपस्थित केला जात आहे.देवस्थानच्या जमिनीतील मुरूम चोरीला कायमचा आळा बसला पाहिजे आणि दोषींवर कठोर कारवाई झाली पाहिजे, अशी मागणी आता जोर धरू लागली आहे.
