पुणे : बँक कर्मचारी संघटनांनी घेतलेल्या संपाच्या निर्णयामुळे आता केंद्र सरकारनेही मोठा निर्णय घेतला आहे सर्वसामान्यपणे दर रविवारी बँकांना सुट्टी असते. मात्र, या आठवड्यात रविवारी 27 सप्टेंबर रोजी देशभरातील बँकांचे कामकाज नियमितपणे सुरू ठेवले जाणार आहे. देशव्यापी संपामुळे नागरिकांचे हाल होऊ नयेत, यासाठी सरकारने हा महत्त्वाचा निर्णय घेतला आहे.
युनायटेड फोरम ऑफ बँक युनियन्स या संघटनेने 28,29,आणि 30 सप्टेंबर या कालावधीत 3 दिवसांचा संप पुकारला आहे. बँक कर्मचाऱ्यांसाठी आठवड्यातून 5 दिवस कामकाजाची पद्धत लागू करावी, ही त्यांची मुख्य मागणी आहे. या विषयावर सरकार आणि युनियनच्या प्रतिनिधींमध्ये चर्चा झाली, परंतु त्यातून कोणताही ठोस मार्ग निघालेला नाही. मागण्या मान्य न झाल्यास संपावर ठाम राहण्याचा इशारा युनियनने दिला आहे.
सलग तीन दिवस बँका बंद राहिल्यास सर्वसामान्य नागरिक आणि ग्राहकांना मोठ्या आर्थिक अडचणींचा सामना करावा लागू शकतो. ही संभाव्य गैरसोय लक्षात घेऊन केंद्रीय अर्थमंत्रालयाने विशेष खबरदारी घेतली आहे. त्यानुसार येत्या रविवारी राज्यातील आणि देशातील सर्व राष्ट्रीयकृत, प्रादेशिक तसेच ग्रामीण बँका उघड्या ठेवण्याचे निर्देश देण्यात आले आहेत.
बँकांचे व्यवहार ठप्प होण्यापूर्वीच नागरिकांनी आपली महत्त्वाची आर्थिक कामे, पैसे काढणे किंवा जमा करणे यांसारखे व्यवहार रविवारीच पूर्ण करून घ्यावेत, असे आवाहन करण्यात आले आहे.
