पुणे : प्रसिद्ध कथावाचक आणि मध्य प्रदेशातील बागेश्वर धामचे प्रमुख धीरेंद्र कृष्ण शास्त्री यांच्यावर एका भक्ताने फसवणुकीचा गंभीर आरोप केला आहे. ‘मुलगा होईल’ असे आश्वासन दिल्यानंतर 10 वर्षांनी बाळाचे नियोजन केले, पण चौथीही मुलगीच जन्माला आल्याने आपली फसवणूक झाल्याचा दावा झांशी (उत्तर प्रदेश) येथील रहिवासी राजेंद्र कुमार यांनी केला आहे. याप्रकरणी त्यांनी अखिल भारतीय अंधश्रद्धा निर्मूलन समितीकडे (अंनिस) दाद मागितली आहे.
काय आहे नेमके प्रकरण?
झांशी येथील मगरवाडा भागात राहणारे राजेंद्र कुमार मार्च 2024 पासून छतरपूर जिल्ह्यातील बागेश्वर धाममध्ये जात होते. मे 2024 मध्ये धीरेंद्र शास्त्री यांनी त्यांची ‘पर्ची’ काढली. त्यात पत्नीला प्रेतबाधा असल्याचे सांगून 21 पेशी करण्याचा सल्ला दिला आणि त्यानंतर ‘पुत्रयोग’ येईल, असे लिहून दिले. आधीच तीन मुली असलेल्या राजेंद्र कुमार यांनी या दाव्यावर विश्वास ठेवून 10 वर्षांनंतर पुन्हा मूल जन्माला घालण्याचा निर्णय घेतला. मात्र, नुकताच त्यांच्या पत्नीने एका मुलीलाच जन्म दिला. यामुळे आपली आर्थिक आणि मानसिक फसवणूक झाल्याचे सांगत त्यांनी ‘अंनिस’चे संघटक हरीश देशमुख यांच्याशी संपर्क साधून तक्रार दाखल केली.
या घटनेनंतर ‘अंनिस’ने आक्रमक भूमिका घेतली आहे. बागेश्वर बाबांनी आपले कथित चमत्कार वैज्ञानिक कसोट्यांवर सिद्ध करून दाखवावेत, असे आव्हान देत समितीने त्यांच्यासाठी 1 कोटी रुपयांच्या बक्षीसाची घोषणा केली आहे. तसेच नागरिकांनी अशा भ्रामक आणि अंधश्रद्धेवर आधारित दाव्यांवर विश्वास ठेवू नये, असे आवाहनही केले आहे.
कोण आहेत धीरेंद्र कृष्ण शास्त्री?
जुलै 1996 मध्ये जन्मलेले धीरेंद्र कृष्ण शास्त्री हे छतरपूर (मध्य प्रदेश) येथील गार्हा गावातील बागेश्वर धामचे मुख्य कथावाचक आहेत. हनुमान भक्ती, भागवत कथा आणि भक्तांच्या समस्या ‘पर्ची’वर लिहून सांगण्याच्या दाव्यांमुळे ते देशभरात प्रसिद्ध झाले. त्यांचे समर्थक याला धार्मिक श्रद्धेचा भाग मानतात, तर अंधश्रद्धा निर्मूलन समिती आणि इतर संघटना त्यांच्या या चमत्कारांच्या वैज्ञानिक पडताळणीची सतत मागणी करत असतात.
