मुंबई: नवरात्रोत्सवाला काही दिवस शिल्लक असताना गुजरात, मुंबईसह देशभरात गरबा आयोजनाची तयारी सुरू आहे. त्याचवेळी सोशल मीडियावर ‘Rent A Garba Partner’ म्हणजेच भाड्याने गरबा पार्टनर देण्याच्या आशयाचे पोस्टर्स आणि जाहिराती व्हायरल होत आहेत. या जाहिरातींमुळे मुंबई, सुरत आणि अहमदाबादमध्ये चर्चेला उधाण आले असून, सायबर क्राईम विभागाकडून याबाबत चौकशी सुरू आहे.
सोशल मीडियावर फिरत असलेल्या जाहिरातींमध्ये सिल्व्हर, गोल्ड आणि प्लॅटिनम अशा वेगवेगळ्या पॅकेजचा उल्लेख करण्यात आला आहे. सिल्व्हर पॅकेजसाठी १,५०० ते २,००० रुपये शुल्क असल्याचे सांगण्यात आले असून, त्यामध्ये दोन तास गरबा खेळणे, मॅचिंग पोषाख, गरब्याच्या सोप्या स्टेप्स शिकवणे आणि सेल्फीचा समावेश असल्याचे जाहिरातींमध्ये नमूद आहे.
गोल्ड पॅकेजसाठी १,५०० ते ३,००० रुपये शुल्क असल्याचा दावा करण्यात आला आहे. या पॅकेजमध्ये चार तास गरबा खेळणे, दोघे कसे भेटले याची खोटी स्टोरी सांगणे आणि सोशल मीडियासाठी रील्स किंवा व्हिडीओ तयार करणे यांचा समावेश असल्याचे जाहिरातींमध्ये म्हटले आहे.
प्लॅटिनम पॅकेजसाठी २,००० ते ६,५०० रुपये शुल्क असल्याचे नमूद करण्यात आले आहे. या पॅकेजमध्ये गरबा कार्यक्रमात पूर्णवेळ सहभाग, दुपट्टा आणि झुमके व्यवस्थित करण्यासाठी मदत, लेट नाईट फूड आउटिंग आणि घरी सुरक्षित पोहोचवण्याचा दावा करण्यात आला आहे.
दरम्यान, अहमदाबाद सायबर सेल आणि पोलिसांनी या जाहिरातींमध्ये तथ्य नसून त्या बनावट असल्याचे स्पष्ट केले आहे. नागरिकांनी अशा जाहिरातींवर विश्वास ठेवू नये तसेच कोणत्याही पैशांच्या मागणीला बळी पडू नये, असे आवाहन करण्यात आले आहे.
मिरा-भाईंदरचे भाजप आमदार नरेंद्र मेहता यांनीही या प्रकरणाची दखल घेत पोलीस आयुक्त निकेत कौशिक यांची भेट घेऊन लेखी तक्रार दिली आहे. या जाहिरातींच्या माध्यमातून महिलांची फसवणूक, हनीट्रॅप, ब्लॅकमेलिंग किंवा आर्थिक फसवणूक करणारे सायबर रॅकेट असण्याची शक्यता त्यांनी व्यक्त केली असून, संबंधित सोशल मीडिया प्रोफाईल्सची चौकशी करून कारवाई करण्याची मागणी केली आहे.
भाड्याने पार्टनर घेण्याची संकल्पना चीनमधून आल्याचे या संदर्भातील माहितीत म्हटले आहे. चीनमध्ये विविध वेबसाइट्स, अॅप्स आणि सोशल मीडिया ग्रुप्सवर भाड्याने गर्लफ्रेंड किंवा बॉयफ्रेंड मिळण्याच्या जाहिराती केल्या जात असल्याचे सांगितले जाते. मात्र, भारतात नवरात्रोत्सवाच्या पार्श्वभूमीवर अशा जाहिराती व्हायरल झाल्याने त्याबाबत चर्चा सुरू झाली आहे.
सध्या मुंबई, अहमदाबाद आणि सुरत सायबर क्राईम पोलिसांकडून या जाहिरातींच्या मागील व्यक्तींचा शोध घेतला जात असून, नागरिकांना सोशल मीडियावरील अशा फसव्या जाहिरातींपासून सावध राहण्याचा इशारा देण्यात आला आहे.
