पुणे: येरवडा मध्यवर्ती कारागृहात असताना दोन आरोपींची ओळख झाली आणि त्यानंतर त्यांनी सायबर गुन्हेगारीसाठी बँक खाती उपलब्ध करून देण्याचा कट रचल्याचा प्रकार समोर आला आहे. पिंपरी-चिंचवड सायबर पोलिसांनी या प्रकरणाचा तपास करत दोन जणांना अटक केली आहे. एका सेवानिवृत्त अधिकाऱ्याला शेअर बाजारातील मोठ्या परताव्याचे आमिष दाखवून तब्बल 86 लाख रुपयांची फसवणूक करण्यात आल्याचे तपासात समोर आले.
अविनाश ज्ञानोबा बाकलिकर (28, रा. लातूर) आणि तेजस ज्ञानोबा लोखंडे (24, रा. मरकळगाव, पुणे) अशी अटक करण्यात आलेल्या आरोपींची नावे आहेत. दोघांची येरवडा कारागृहात ओळख झाली होती. अविनाश हा सायबर गुन्ह्याच्या प्रकरणात कारागृहात होता, तर तेजसवर अपहरण आणि खंडणीचा गुन्हा असल्याची माहिती पोलिसांनी दिली.
कारागृहातून बाहेर आल्यानंतर आरोपींनी कथितरित्या सायबर गुन्हेगारांच्या संपर्कात राहून विविध बँक खाती मिळवली. या खात्यांचा वापर फसवणुकीतून मिळणारी रक्कम वळवण्यासाठी केल्याचा संशय आहे. काही बोगस कंपन्यांच्या नावाने कार्यालये सुरू करून त्याद्वारे बँक खाती उपलब्ध करून देण्यात आल्याचेही तपासात निष्पन्न झाले आहे.
या प्रकरणातील तक्रारदार हे मावळमधील खासगी कंपनीत उपमहाव्यवस्थापक पदावरून निवृत्त झालेले 60 वर्षीय अधिकारी आहेत. शेअर बाजारात मोठा नफा मिळवून देण्याचे आमिष दाखवत त्यांच्याशी संपर्क साधण्यात आला. त्यानंतर 10 जून ते 14 जुलै या कालावधीत विविध खात्यांमध्ये 86 लाख रुपये जमा करून घेण्यात आले.
फसवणुकीच्या रकमेपैकी 5 लाख रुपये तेजस लोखंडेच्या खात्यात गेल्यानंतर पोलिसांना महत्त्वाचा धागा मिळाला. दरम्यान, अधिक तपास करत लातूर आणि पुणे परिसरातून दोन्ही आरोपींना ताब्यात घेण्यात आले असून अधिक तपास सुरु आहे.
