आदित्य बोराटे
इंदापूर: इंदापुरात शनिवारी (दि.२७) जून रोजी आयोजित करण्यात आलेल्या शिक्षक पतसंस्थेच्या वार्षिक सभेदरम्यान महापुरुषांच्या प्रतिमांचा अवमान झाल्याचा आरोप करत संबंधितांवर चौकशी करून कठोर कारवाई करण्याची मागणी निर्भय महाराष्ट्र पक्षाचे तालुकाध्यक्ष किशोर सोनवणे यांनी इंदापूर पोलिसांकडे निवेदनाद्वारे केली आहे.
पोलिस निरीक्षकांना दिलेल्या निवेदनात नमूद करण्यात आले आहे की, शिक्षक पतसंस्थेच्या वार्षिक सभेमध्ये छत्रपती शिवाजी महाराज, भारतरत्न डॉ. बाबासाहेब आंबेडकर, लोकशाहीर अण्णाभाऊ साठे, राजर्षी शाहू महाराज, संत गाडगे महाराज, महात्मा ज्योतिराव फुले, क्रांतिज्योती सावित्रीबाई फुले, प. पू. अहिल्याबाई होळकर तसेच राजमाता जिजाऊ यांच्या प्रतिमा व्यासपीठाखाली ठेवण्यात आल्या होत्या. सभेदरम्यान झालेल्या गोंधळात काही व्यक्तींच्या धक्काबुक्कीमुळे या प्रतिमांचा अवमान झाल्याचा आरोप करण्यात आला आहे.
या घटनेचा व्हिडिओ काही वृत्तवाहिन्या आणि सोशल मीडियावर प्रसारित झाल्याचा दावा निवेदनात करण्यात आला असून, त्यामुळे महापुरुषांच्या अनुयायांच्या भावना दुखावल्या गेल्याचेही नमूद करण्यात आले आहे. या प्रकरणाची निष्पक्ष चौकशी करून दोषींवर कायदेशीर कारवाई करावी, तसेच सभेचे आयोजक, पदाधिकारी आणि संबंधित जबाबदार व्यक्तींची जबाबदारी निश्चित करावी, अशी मागणी करण्यात आली आहे.
हे निवेदन निर्भय महाराष्ट्र पक्षाचे तालुकाध्यक्ष किशोर अजिनाथ सोनवणे आणि शहराध्यक्ष अमोल गणेश परदेशी, उपाध्यक्ष धनराज भराडे यांनी पोलिसांकडे सादर केले आहे. दरम्यान, या निवेदनानंतर पोलिस प्रशासन या प्रकरणाची चौकशी करून पुढील काय कारवाई करते, याकडे लक्ष लागले आहे.
