पुणे : मंदिरात दर्शनासाठी गेलेल्या एका वयोवृद्ध महिलेचा विश्वास संपादन करून भामट्यांनी तिच्या गळ्यातील सोन्याचे मंगळसूत्र लंपास केल्याची घटना चाकण परिसरात घडली आहे. दानधर्माच्या नावाखाली महिलेशी संवाद साधत तिचे लक्ष दुसरीकडे वळवण्यात आले. त्यानंतर हातचलाखीने सुमारे 1 लाख 50 हजार रुपये किमतीचे मंगळसूत्र चोरीला गेल्याचे समोर आले आहे. ही घटना चाकण-शिक्रापूर मार्गावरील भोसे गावठाण येथील महादेव मंदिरात 27 ऑगस्ट रोजी सकाळी साडेअकराच्या सुमारास घडली. मंदिरात आलेल्या महिलेचा दोन अनोळखी व्यक्तींनी आधी संवाद साधून विश्वास संपादन केला.
मिळालेल्या माहितीनुसार, आरोपींनी महिलेला भावनिक कारण सांगितले. आपल्या आईची प्रकृती खराब असून ती लवकर बरी व्हावी, यासाठी गरजू व्यक्तीला पैसे दान करायचे असल्याचे त्यांनी महिलेला सांगितले. त्यांच्या बोलण्यावर विश्वास ठेवल्याने महिला त्यांच्याशी बोलत राहिली. महिलेचे लक्ष संभाषणात गुंतले असताना दोघांनी हातचलाखी केली. याच संधीचा फायदा घेत तिच्या गळ्यातील सोन्याचे मंगळसूत्र काढून घेतल्याचा आरोप आहे. मंगळसूत्राची किंमत सुमारे 1 लाख 50 हजार रुपये असल्याची माहिती आहे. चोरी केल्यानंतर दोन्ही संशयित तेथून निघून गेले.
काही वेळाने महिलेच्या लक्षात मंगळसूत्र नसल्याचे आले. प्रकार समजल्यानंतर तिच्या सुनेने तातडीने चाकण पोलीस ठाणे गाठून तक्रार दाखल केली. तक्रारीच्या आधारे पोलिसांनी दोन अज्ञात व्यक्तींविरोधात चोरी आणि फसवणुकीचा गुन्हा दाखल केला आहे.
आरोपींचा माग काढण्यासाठी पोलिसांनी मंदिर परिसरातील तसेच आसपासच्या भागातील सीसीटीव्ही फुटेज तपासण्यास सुरुवात केली आहे. संशयित व्यक्तींची ओळख पटवण्याचे काम सुरू असून, त्यांच्या हालचालींबाबत पोलिसांकडून माहिती गोळा केली जात आहे. या घटनेमुळे मंदिर परिसरातील नागरिकांमध्येही चिंता निर्माण झाली असून, चाकण पोलीस पुढील तपास करत आहेत.
