शिरूर: शिरूर तालुक्यातील रामलिंग येथे बंद घराचे कुलूप तोडून अज्ञात चोरट्याने घरात प्रवेश केला. बेडरूममधील लोखंडी कपाट फोडून त्यातील तिजोरीच्या कप्प्यात ठेवलेले सोन्या-चांदीचे दागिने तसेच रोख रक्कम असा तब्बल ४ लाख ८५ हजार ५० रुपयांचा ऐवज चोरून नेल्याची घटना उघडकीस आली आहे.
याप्रकरणी गंगाधर रामचंद्र भोसले (वय ६९, रा. रामलिंग, ता.शिरूर, जि. पुणे; सध्या रा. मुंबई) यांनी शिरूर पोलिस ठाण्यात फिर्याद दिली आहे.फिर्यादीने दिलेल्या फिर्यादीवरून अज्ञात चोरट्याविरुद्ध शिरूर पोलिस ठाण्यात गुन्हा दाखल करण्यात आला आहे.
या घटनेसंदर्भात पोलिसांनी दिलेल्या माहितीनुसार,१३ऑगस्ट रोजी दुपारी दोन वाजल्यापासून २७ ऑगस्ट रोजी सकाळी ११ वाजेपर्यंतच्या कालावधीत ही चोरी झाल्याचा संशय आहे.गंगाधर भोसले यांच्या घराच्या दरवाजाचे कुलूप व कडी-कोंडे अज्ञात चोरट्याने कशाच्या तरी सहाय्याने तोडून घरात प्रवेश केला. त्यानंतर बेडरूममधील लोखंडी कपाटाचा दरवाजा फोडून तिजोरीचा कप्पाही तोडण्यात आला.
या तिजोरीत ठेवलेले सोन्याचे विविध दागिने,मंगळसूत्रे, सातपुतळ्या,कानातले,नथी तसेच चांदीचा पाळणा, चांदीच्या पादुका, चांदीचे गोळे आणि ३ हजार ६०० रुपये रोख असा एकूण ४ लाख ८५ हजार ५० रुपयांचा मुद्देमाल चोरट्याने लंपास केला आहे.
दरम्यान, घरात चोरी झाल्याचे लक्षात आल्यानंतर भोसले यांनी शिरूर पोलिस ठाण्यात धाव घेत तक्रार दाखल केली.याप्रकरणी अज्ञात चोरट्याचा शोध घेण्यासाठी पोलिसांकडून तपास सुरू असून, शिरूरचे पोलीस निरीक्षक विनोद पाटील यांच्या मार्गदर्शनाखाली पुढील तपास सुरू आहे.
