पुणे : पुण्यातून संतापजनक प्रकार उघडकीस आला आहे. पौड रोडवरील एमआयटी कॉलेजजवळ एका मद्यधुंद तरूणाने भरधाव वेगात कार चालवून अक्षरशः धुमाकूळ घातला. गुरुवारी रात्री सुमारे 8 वाजण्याच्या सुमारास घडलेल्या या घटनेमुळे परिसरात काही काळ तीव्र भीतीचे आणि दहशतीचे वातावरण निर्माण झाले होते.
मिळालेल्या माहितीनुसार, 24 वर्षांचा हा तरुण दारूच्या नशेत पूर्णपणे चूर होता. त्याने भरधाव कार चालवत रस्त्यावरील तीन ते चार दुचाकी वाहनांना जोरदार धडक दिली. या अचानक झालेल्या अपघातामध्ये काही दुचाकीस्वार किरकोळ जखमी झाले असून, वाहनांचे मोठे नुकसान झाले आहे. या प्रकारामुळे रस्त्यावर मोठी वाहतूक कोंडी देखील झाली होती, ज्यामुळे ये-जा करणाऱ्या वाहनचालकांमध्ये घबराट पसरली.
हा सगळा प्रकार पाहून रस्त्यावरील संतप्त नागरिक आणि प्रत्यक्षदर्शींनी तातडीने धाव घेऊन त्या मद्यधुंद चालकाची कार अडवली. शेकडो नागरिकांनी त्या तरुणाला गाडीतून बाहेर खेचत जाब विचारला आणि त्याला घेरले. या तरुणाच्या बेजबाबदार वागण्यामुळे नागरिकांमध्ये तीव्र संताप पाहायला मिळाला.
घटनेची माहिती मिळताच कोथरूड पोलीस तात्काळ घटनास्थळी दाखल झाले. पोलिसांनी त्वरित कारवाई करत त्या मद्यधुंद चालकाला आपल्या ताब्यात घेतले आणि वैद्यकीय तपासणीसाठी रुग्णालयात हलवले. पोलिसांनी कारवाई केल्यानंतर नागरिकांनी सुटकेचा निश्वास सोडला. शहरात वारंवार घडणाऱ्या अशा ‘ड्रिंक अँड ड्राइव्ह’च्या घटनांमुळे सुरक्षिततेचा प्रश्न पुन्हा एकदा ऐरणीवर आला आहे.
