पुणे : महाराष्ट्र राज्य माध्यमिक व उच्च माध्यमिक शिक्षण मंडळाने 2027 मध्ये होणाऱ्या दहावी आणि बारावीच्या परीक्षांचे अंतिम वेळापत्रक जाहीर केले आहे. फेब्रुवारी-मार्च महिन्यात या परीक्षा पार पडणार असून, विद्यार्थ्यांना आता परीक्षेच्या तयारीचे नियोजन करता येणार आहे. राज्यातील 9 विभागीय मंडळांच्या माध्यमातून या परीक्षा घेतल्या जातील.
मंडळाने जाहीर केलेल्या वेळापत्रकानुसार, बारावीची लेखी परीक्षा 8 फेब्रुवारी 2027 पासून सुरू होणार असून 18 मार्च 2027 पर्यंत चालणार आहे. तर दहावीची लेखी परीक्षा 15 फेब्रुवारी 2027 ते 15 मार्च 2027 या कालावधीत आयोजित करण्यात आली आहे.
बारावीच्या परीक्षेचे वेळापत्रक
बारावीच्या विद्यार्थ्यांसाठी लेखी परीक्षेआधीच प्रात्यक्षिक आणि अंतर्गत मूल्यमापनाच्या परीक्षा घेतल्या जाणार आहेत. या परीक्षा 20 जानेवारी 2027 ते 6 फेब्रुवारी 2027 दरम्यान होतील. यामध्ये प्रात्यक्षिक, तोंडी परीक्षा, श्रेणी आणि अंतर्गत मूल्यमापनाचा समावेश आहे.
दहावीच्या विद्यार्थ्यांसाठी महत्त्वाच्या तारखा
दहावीच्या प्रात्यक्षिक, तोंडी, श्रेणी आणि अंतर्गत मूल्यमापनाच्या परीक्षा 28 जानेवारी 2027 पासून सुरू होतील. या परीक्षा 13 फेब्रुवारी 2027 पर्यंत पूर्ण होतील. त्यानंतर 15 फेब्रुवारीपासून लेखी परीक्षांना सुरुवात होणार आहे.
विद्यार्थी आणि पालकांना परीक्षांचे विषयानुसार सविस्तर वेळापत्रक मंडळाच्या अधिकृत संकेतस्थळावर पाहता येणार आहे. यासाठी www.mahahsscboard.in या वेबसाइटला भेट द्यावी. तेथून वेळापत्रक डाउनलोड करून परीक्षेचे नियोजन करता येईल.
