पुणे : पुणे आंतरराष्ट्रीय विमानतळावर कस्टम विभागाने अमली पदार्थ तस्करीविरोधात मोठी कारवाई केली आहे. बँकॉकहून आलेल्या एका भारतीय महिला प्रवाशाकडून १ कोटी १४ लाख रुपये किमतीचा ३ किलो २५५ ग्रॅम हायड्रोपोनिक गांजा जप्त करण्यात आला आहे. या प्रकरणी संबंधित महिलेला अटक करण्यात आली असून, गांजा तस्करीमागील नेटवर्कचा शोध घेण्यासाठी तपास सुरू आहे.
पुणे कस्टम विभागाने दिलेल्या माहितीनुसार, ५ नोव्हेंबर २०२६ रोजी सायंकाळी एअर इंडिया एक्स्प्रेसच्या IX-291 या विमानाने एक भारतीय महिला प्रवासी बँकॉकहून पुणे विमानतळावर दाखल झाली. प्रवाशांच्या प्रोफाइलिंगदरम्यान आणि चेक-इन बॅगेजच्या स्कॅनिंगमध्ये संशयास्पद बाबी आढळून आल्या. त्यामुळे एअर इंटेलिजन्स युनिट (AIU) आणि विमानतळावरील कस्टम अधिकाऱ्यांनी महिलेला ताब्यात घेत तिच्या सामानाची तपासणी केली.
या तपासणीत महिलेच्या ट्रॉली बॅगेच्या आतील अस्तरामागे दोन्ही बाजूंना विशेष पद्धतीने तयार केलेले छुपे कप्पे आढळले. या कप्प्यांमध्ये काळ्या प्लास्टिकच्या तीन थरांत व्हॅक्यूम सील केलेली दोन आयताकृती पाकिटे लपवण्यात आली होती.
पाकिटे उघडून तपासली असता त्यामध्ये उग्र वास येणारा नारिंगी-हिरवट रंगाचा वाळलेला वनस्पतीजन्य पदार्थ आढळला. नार्कोटिक ड्रग फील्ड टेस्टिंग किटद्वारे तपासणी केली असता हा पदार्थ हायड्रोपोनिक गांजा असल्याचे स्पष्ट झाले.
कस्टम विभागाने एकूण ३ किलो २५५ ग्रॅम गांजा जप्त केला असून, त्याची अंदाजे बाजारभावानुसार किंमत १ कोटी १४ लाख रुपये आहे. हा मुद्देमाल अमली पदार्थ आणि मनोविकारास कारणीभूत पदार्थ प्रतिबंधक कायदा (NDPS Act, 1985) अंतर्गत जप्त करण्यात आला आहे.
या प्रकरणी महिला प्रवाशाला अटक करण्यात आली आहे. हा गांजा कोणासाठी आणण्यात आला होता, तस्करी कोणाच्या सांगण्यावरून केली जात होती आणि यामागे आणखी कोणाचे जाळे कार्यरत आहे का, याचा तपास पुणे कस्टम विभागाकडून सुरू आहे.
