पिंपरी : पिंपरी-चिंचवडमध्ये अघोरी प्रकार करण्याचा प्रयत्न झाला. पत्नीने पतीला नखे खायला घालून त्याच्यावर अघोरी जादूटोणा करण्याचा प्रयत्न केला. याबाबतची फिर्याद पीडित पतीने दिल्यानंतर पत्नीसह सात जणांवर वाकड पोलीस ठाण्यात गुन्हा दाखल करण्यात आला असून, एकाला अटक करण्यात आली.
योगेश शिवाजी आपुणे (वय 33, रा. तापकीर चौक, काळेवाडी) यांनी वाकड पोलीस ठाण्यात फिर्याद दिली. योगेश आपुणे हे त्यांच्या पत्नीसोबत काळेवाडी येथील तापकीर चौक येथे भाड्याच्या घरात राहतात. त्यांच्यामध्ये घरगुती कारणावरून भांडण होत असायचे. या कारणावरुन फिर्यादी यांच्या पत्नीने मोहोळ येथील बाबाजी शेख याच्यासोबत फोनवर चर्चा करुन जादूटोण्याबबत विचारपूस केली. तेव्हा तिला जेवणात नखे आणि इतर वस्तू खायला देण्यासंदर्भात चर्चा झाल्याचे कळले.
हे समजताच त्यांनी पत्नीच्या आई-वडिलांना सांगितलं. मात्र, त्यांनी उलट जावयाविरोधातच केलं. त्यांनी योगेश आपुणे यांना नखे खायला देणे, मायाजाळ नावाची वस्तू व इतर वस्तू पाण्यात मिसळून खाण्यास देण्याचे प्रकार केले. त्यानंतर सासरे गोपाळ शिंदे यांनी शुक्रवारी रात्री फिर्यादी यांना बेदम मारहाण केली. तर मेहुण्याने कोयत्याने डोक्यात वार करुन गंभीर जखमी केले.
पत्नीसह सासू-सासऱ्यांविरोधात गुन्हा दाखल
याप्रकरणाची तक्रार योगेश यांनी पोलिसांत दिली. या तक्रारीवरून पोलिसांनी सासरे गोपाळ लिंबराज शिंदे (वय 55), मेहुणा अनिल गोपाळ शिंदे (वय 25), अक्षय गोपाळ शिंदे (वय 23) यांसह इतर काही जणांवर विविध कलमान्वये गुन्हा दाखल केला. तर पोलिसांनी मेहुणा अनिल शिंदे याला अटक केली आहे.
