दीपक खिलारे
इंदापूर : ग्रामपंचायतींकडून आलेल्या टँकर मागणीच्या प्रस्तावांना 12 तासात मंजुरी द्यावी, शेतमजुरांना रोजगार हमी योजनेतून कामे उपलब्ध करून द्यावीत, अशा सूचना हर्षवर्धन पाटील यांनी बारामतीचे प्रांत अधिकारी आणि इंदापूरचे तहसीलदार यांना केल्या आहेत.
तसेच मध्यंतरी वादळामुळे इंदापूर तालुक्यात अनेक ठिकाणी पिके, फळबागा यांचे नुकसान झाल्याने पंचनामे झाले असून दुष्काळी परिस्थितीच्या पार्श्वभूमीवर नागरिकांना दिलासा देण्याची गरज आहे, असे प्रतिपादन माजी मंत्री हर्षवर्धन पाटील यांनी इंदापूर येथे केले.
ते पुढे म्हणाले, इंदापूरचे तहसीलदार श्रीकांत पाटील यांचेवर झालेला हल्ला निषेधार्ह आहे. तालुक्याची संस्कृती चांगली आहे. सन 1952 पासून शंकररावजी भाऊ पासून व नंतर वीस वर्षे आंम्ही सत्तेवर असताना असे कधीही घडलेले नाही याला जबाबदार असणाऱ्यांवर कडक कारवाई करण्याची मागणी आम्ही केली आहे.
पुढे बोलताना म्हणाले, कळाशी येथे घडलेली बोट दुर्घटना ही दुर्दैवी आहे, यामध्ये सहा जणांचा मृत्यू झाला. करमाळा तालुक्यातील धनंजय डोंगरे यांच्या कुटुंबासह इतरांची भेट मी घेणार आहे. बोट प्रवासादरम्यान प्रवाशांनी जॅकेट व इतर सुरक्षा साधने वापरणे आवश्यक असल्याचेही हर्षवर्धन पाटील म्हणाले.
उजनी धरणामध्ये डिसेंबर महिन्यात 72 टक्के एवढा पाणीसाठा होता. उजनीतील पाणीसाठा वापराचे जर योग्य नियोजन झाले असते, तर आज चांगली परिस्थिती दिसली असती. मात्र, सध्या उजनी धरणात अत्यल्प पाणीसाठा शिल्लक राहिला आहे. त्यामुळे मुख्यमंत्री व दोन्ही उपमुख्यमंत्र्यांबरोबर उजनीतील जलसाठ्याचे उच्चस्तरावरती नियोजनाबाबत चर्चा करणार आहे, असंही यावेळी हर्षवर्धन पाटील यांनी स्पष्ट केले.
बारामती सह राज्यात महायुती जिंकणार : हर्षवर्धन पाटील
लोकसभा निवडणुकीचा निकाल आता अवघ्या दिवसांवर आला आहे. मतमोजणी 4 जूनला होणार आहे. बारामती लोकसभा मतदारसंघातील महायुतीच्या उमेदवार सुनेत्रा पवार यांच्यासह राज्यामध्ये महायुतीचे उमेदवार मोठ्या संख्येने निवडून येतील, असा विश्वास हर्षवर्धन पाटील यांनी व्यक्त केला.
