गोंदिया : गोंदियामध्ये शिवशाही बस अपघातात ११ प्रवाशांचा मृत्यू झाला आहे. सडक अर्जुनी तालुक्यातील खजरी ते डव्वा दरम्यान हा अपघात झाला होता. भरधाव वेगात चालकाचं बसवरील नियंत्रण सुटून हा अपघात झाल्याची माहीत मिळत होती. दरम्यान, आता या बसच्या चालकाबाबत धक्कादायक अशी माहिती समोर आली आहे. बसचालक प्रणय रायपूरकर याला पोलिसांनी अटक केली असून त्याला २ डिसेंबरपर्यंत पोलीस कोठडी सुनावण्यात आली आहे.
अधिक माहिती ताशी की, शिवशाही बसचा चालक प्रणय उल्हासराव रायपूरकर हा २०११ मध्ये भंडारा आगारात वाहनचालक म्हणून रुजू झाला होता. त्याचा बॅच नंबर ३१८ असून गेल्या १२ वर्षात प्रणय रायपूरकर याच्याकडून ७ वेळा अपघात झाला असल्याची माहिती समोर येत आहे. डिसेंबर २०१२ ते २९ नोव्हेंबर २०२४ या काळात प्रणय रायपूरकर याच्या हातून एसटीचे सात अपघात झाले आहेत.
प्रणय रायपूरकरकडून २० डिसेंबर २०१२ रोजी पहिला अपघात झाला होता. तो अपघात गंभीर होता पण चौकशीनंतर त्याची निर्दोष सुटका करण्यात आली होती. शिवशाहीच्या अपघाताआधी झालेल्या ६ घटनांमध्ये सुदैवाने कुणाचा मृत्यू झाला नव्हता. पण यात दोषी आढळल्यानंतरही त्याच्यावर कोणती कठोर कारवाई करण्यात आली नव्हती. शिवशाही बसच्या अपघात प्रकरणी प्रणय रायपूरकर याच्यावर गुन्हा दाखल करण्यात आला असून न्यायालयात हजर करण्यात आल्यानंतर २ डिसेंबरपर्यंत पोलीस कोठडी सुनावली आहे.
