कोयंबतूर : कार किंवा दुचाकी खरेदीसाठी लाखो रुपयांची चिल्लर घेऊन शोरूममध्ये जाणाऱ्या घटना आपण ऐकल्या असतील. मात्र, तमिळनाडूमधील कोयंबतूर येथे एक विचित्र प्रकरण समोर आले आहे. एका पतीने पत्नीला दिलेल्या भत्त्याच्या रकमेतून ८० हजार रुपयांची चिल्लर भरून २० झोळ्यांमध्ये न्यायालयात नेली. या घटनेचा व्हिडीओ सध्या सोशल मीडियावर चांगलाच व्हायरल झाला आहे.
कोयंबतूर येथील वडावल्ली भागात ३७ वर्षीय व्यक्ती राहण्यास आहे. तो एक टॅक्सी चालक आहे. पत्नीने दाखल केलेल्या घटस्फोटाच्या प्रकरणात न्यायालयाच्या आदेशानुसार २ लाख रुपयांचा अंतरिम भत्ता देण्यास तयार असल्याचे सांगितले होते. या आदेशानुसार, बुधवारी तो आपल्या कारमध्ये २ आणि १ रुपयांच्या नाण्यांनी भरलेल्या २० झोळ्या घेऊन अतिरिक्त कौटुंबिक न्यायालयात पोहोचला.
नाण्यांनी भरलेल्या झोळ्यांचा हा प्रकार पाहून न्यायालयाने हा भरणा स्वीकारण्यास नकार दिला. न्यायालयाने संबंधित व्यक्तीस भरणा नोटांमध्ये करण्याचे निर्देश दिले. यानंतर न्यायालयाच्या आवारातून चिल्लर घेऊन बाहेर पडणाऱ्या व्यक्तीचा व्हिडीओ सोशल मीडियावर चांगलाच व्हायरल झाला. त्यानंतर दुसऱ्या दिवशी म्हणजेच गुरुवारी संबंधित व्यक्तीने नोटांच्या स्वरूपात ८० हजार रुपयांचा भरणा केला. न्यायालयाने हा भरणा स्वीकारला आणि उर्वरित १.२ लाख रुपये लवकरच भरण्याचे निर्देश दिले.
Tamil Nadu: In a Coimbatore divorce case, the judge ordered the husband to pay two lakh rupees as alimony. Instead, he brought 20 bundles of one and two rupee coins. The judge advised him to exchange them for notes and adjourned the case. The husband then took the coins and left pic.twitter.com/j0SvhMPK6n
— IANS (@ians_india) December 19, 2024
