नाशिक : बहिणीसोबत प्रेमसंबंध असल्याच्या संशयातून एका 18 वर्षीय तरुणाची चाकूने वार करून हत्या करण्यात आल्याची धक्कादायक घटना त्र्यंबकेश्वर तालुक्यातील सापगाव येथे घडली आहे. या प्रकरणी त्र्यंबकेश्वर पोलिसांनी 20 वर्षीय संशयित आरोपीला अटक केली असून पुढील तपास सुरू आहे.
मृत तरुणाचे नाव आर्यन सोमनाथ कांबळे (वय 18) असे आहे. तर आदित्य एकनाथ मोंढे (वय 20, रा. शिरसगाव, त्र्यंबकेश्वर) असे अटक करण्यात आलेल्या संशयिताचे नाव आहे.
पोलिसांनी दिलेल्या माहितीनुसार, त्र्यंबकेश्वर शहरापासून सुमारे 3 किलोमीटर अंतरावर असलेल्या सापगाव ते ब्रह्मगिरी फेरी मार्गावरील स्मशानभूमीजवळ ही घटना घडली. बहिणीसोबत प्रेमसंबंध असल्याच्या कारणावरून आदित्यने आर्यनला भेटण्यासाठी या ठिकाणी बोलावल्याची माहिती समोर आली आहे.
वादातून चाकूने हल्ला
भेटीदरम्यान दोघांमध्ये वाद झाला. या वादाचे रूपांतर हाणामारीत झाले आणि संशयित आरोपीने आर्यनवर धारदार चाकूने हल्ला केला. त्याच्या पोटावर, गळ्यावर, छातीवर आणि हातावर वार करण्यात आले. या हल्ल्यात आर्यन गंभीर जखमी झाला.
घटनेनंतर आर्यनला तातडीने उपचारासाठी रुग्णालयात दाखल करण्यात आले. मात्र, डॉक्टरांचे प्रयत्न सुरू असतानाच उपचारादरम्यान त्याचा मृत्यू झाला. या घटनेमुळे कांबळे कुटुंबावर दुःखाचा डोंगर कोसळला आहे.
त्र्यंबकेश्वर पोलिसांकडून तपास सुरू
या प्रकरणी मृत आर्यनचे नातेवाईक रोशन पप्पू कांबळे यांनी पोलिसांत तक्रार दाखल केली. त्यांच्या फिर्यादीवरून आदित्य मोंढे याच्याविरोधात भारतीय न्याय संहिता 2023 मधील कलम 103 (1) अंतर्गत हत्येचा गुन्हा नोंदवण्यात आला आहे. पोलिसांनी आरोपीला अटक केली असून या हत्येमागे नेमके कोणते कारण होते, याचा अधिक तपास सुरू आहे.
