शेगाव (बुलढाणा): फोटो व्हायरल करण्याची धमकी देऊन खामगाव तालुक्यातील एका अल्पवयीन मुलीवर शेगाव येथे तिच्या मावस मामाने अत्याचार केल्याप्रकणी सदर आरोपी युवकाविरुद्ध गुन्हा दाखल करण्यात आला आहे. या घटनेतील पीडित मुलगी खामगाव तालुक्यातील असून आरोपी हा पीडित मुलीचा मावसमामा आहे. आरोपी अकोला जिल्ह्यातील बाळापूर तालुक्यातील एका गावचा राहणारा आहे. पीडित मुलगी तिच्या एका मैत्रिणीसह शेगावात रूम करून राहत होती. काही दिवसांनंतर मुलीची मैत्रीण रूम सोडून गेल्याने पीडित मुलगी एकटीच राहत होती.
दरम्यान, एकेदिवशी मुलीचा मामा तिच्या रूमवर आला. तिला त्याच्या मोबाइलमध्ये असलेले दोघांचे फोटो दाखविले. हे फोटो तू कधी काढले, अशी विचारणा मुलीने मामाला केली असता मागच्या वेळी तुझ्या रूमवर आलो होतो, तेव्हा काढले असे त्याने सांगितले. शिवाय ते फोटो व्हायरल करून बदनामी करण्याची धमकी देऊन तिच्या इच्छेविरुद्ध रूममध्ये तिच्याशी जबरदस्ती शारीरिक संबंध ठेवले.
त्यानंतर त्याने पुन्हा एक-दोन वेळी असे कृत्य केले. घडलेला प्रकार मुलीने तिच्या आईला सांगितला. दरम्यानच्या काळात मुलीचे मणक्याचे ऑपरेशन झाले. तिला चालता देखील येत नव्हते. त्यामुळे आतापर्यंत तक्रार देण्यात आली नव्हती. मात्र, १२ सप्टेंबरला पारस फाट्यावर पीडित मुलीच्या आईला आरोपी भेटला. तुझ्या मुलीचे लग्न माझ्यासोबत लावून दे, असे म्हणत मुलीच्या आईला मारहाण केली.
मुलीच्या आईचा मोबाइलदेखील आरोपीने हिसकावून नेला. याप्रकरणाची तक्रार शेगाव शहर पोलीस ठाण्यात देण्यात आली. पोलिसांनी आरोपी मामाविरुद्ध गुन्हा दाखल केला आहे. गुन्ह्याचा तपास साहाय्यक पोलीस निरीक्षक सोनटक्के यांच्याकडे देण्यात आला आहे.
