Nagpur News : नागपूर जिल्ह्यातील खापा पोलीस स्टेशनच्या हद्दीत कनक कॉटन इंडस्ट्रीजमध्ये दोन कामगारांचा कापसाच्या ढिगाऱ्याखाली दबून मृत्यू झाल्याची दुर्दैवी घटना समोर आली आहे. हे दोनीही तरुण कामगार कापसाच्या ढिगार्‍यावर जाऊन झोपले होते. या दुर्दैवी घटनेने परिसरात हळहळ व्यक्त केली जात आहे.
दरम्यान, सोमवारी १८ डिसेंबरला कनक कॉटन इंडस्ट्रीज कंपनीमध्ये जिनिंगचे काम सुरू असताना मशीनमध्ये तांत्रिक बिघाड झाल्यामुळे काम बंद पडले होते. काम बंद पडल्याने बिरमराम देदाराम भिल आणि पंकज मंगिलाल भिल हे दोघेही कामगार आराम करण्यासाठी कापसाच्या ढिगाऱ्यावर जाऊन झोपले होते. हीच क्षणभराची विश्रांती या कामगारांच्या जिवावार बेतली आहे.
गाढ झोपेत असताना अचानक कापसाचा ढीग कोसळला आणि दोघेही कामगार त्या ढिगाऱ्याखाली दबून राहिले. त्यात गुदमरून दोघांचाही दुर्दैवी मृत्यू झाला. सकाळी जेव्हा इतर मजूर कामावर आले, तेव्हा त्यांना शंका आली आणि शोधा शोध सुरू झाली.
यावेळी हे दोन्ही कामगार कापसाच्या ढिगाऱ्याखाली आढळून आले. त्यांना उपचारासाठी रुग्णालयात दाखल केले असता डॉक्टरांनी मृत घोषित केले. या दुर्दैवी घटनेने परिसरात एकच खळबळ उडाली आहे.
