Mumbai Local Train : मुंबई लोकल ट्रेनने प्रवास करणाऱ्यांसाठी महत्वाची बातमी आहे. पश्चिम रेल्वेने आज मंगळवारी मध्यरात्री १:१० ते उद्या बुधवारी पहाटे ४:४० पर्यंत विशेष ब्लॉक घोषित करण्यात आला आहे. अंधेरी येथील गोपाळ कृष्ण गोखले रेल्वे उड्डाणपुलाच्या कामांसाठी हा ब्लॉक घेण्यात येणार असल्याची माहिती विभागाकडून देण्यात आली आहे. ब्लॉकदरम्यान लोकलच्या अनेक फेऱ्या रद्द करण्यात आल्या असून या मार्गावर प्रवास करणाऱ्या प्रवाशांनी वेळापत्रक पाहूनच नियोजन करावं, असं आवाहन रेल्वे प्रशासनाच्या वतीने करण्यात आलं आहे.
रेल्वे प्रशासनाने दिलेल्या माहितीनुसार, अंधेरी येथील गोपाळ कृष्ण गोखले रेल्वे उड्डाणपुलाचं काम मंगळवारपासून सुरू होणार आहे. या कामासाठी पश्चिम रेल्वेवरील पाचव्या-सहाव्या मार्गावर ब्लॉक घेण्यात येणार आहे. त्यामुळे विरार येथून अंधेरीसाठी रात्री १०.१८ वाजता सुटणारी लोकल रद्द करण्यात आली आहे. तर वसई रोड ते अंधेरी रात्री ११.१५ वाजेची लोकल रद्द करण्यात आली आहे. याशिवाय चर्चगेट-विलेपार्ले मध्यरात्री १२.३० वाजता सुटणाऱ्या लोकलची फेरी देखील रद्द करण्यात आली आहे.
बुधवारी पहाटे ४.२५ वाजून सुटणारी अंधेरी ते विरार, पहाटे ४.०५ वांद्रे-बोरिवली, बोरिवली-चर्चगेट, अंधेरी-विरार आणि पहाटे ४.०५ वाजता सुटणाऱ्या अंधेरी-चर्चगेट लोकलच्या फेऱ्या रद्द करण्यात आल्या आहेत. त्यामुळे घराबाहेर पडण्यापूर्वी वेळापत्रक पाहूनच बाहेर पडा असं असं आवाहन रेल्वे प्रशासनाच्या वतीने करण्यात आलं आहे.
