पुणे: पुण्यातील खडकी परिसरात महिलांमधील वादातून चांदणे गँगने केलेल्या प्राणघातक हल्ल्यामुळे खळबळ उडाली आहे. भांडण सोडविण्यासाठी गेलेल्या तरुणावर कोयत्याने वार करून त्याला जीवे मारण्याचा प्रयत्न करण्यात आला. या प्रकरणी खडकी पोलिसांनी चांदणे गँगचा अनिकेत चांदणे याच्यासह चौघांना अटक केली आहे.
अटक करण्यात आलेल्यांमध्ये अनिकेत दत्ता चांदणे (24), अनिकेत शिरीष पठारे (26), नकुल गायकवाड (24) आणि कुबेर लखन (24) यांचा समावेश आहे. तर सागर चांदणे, आकाश चांदणे, यश गोपनारायण, सलमान शेख, राहुल विघ्नेश्वर, बाब्या उर्फ राज सोनार आणि त्यांच्या तीन महिला मैत्रिणींविरुद्ध खुनाच्या प्रयत्नाचा गुन्हा दाखल करण्यात आला आहे.
याप्रकरणी सुभाष बाबू संगेला यांनी खडकी पोलीस ठाण्यात फिर्याद दिली असून त्यांचे चुलत भाऊ राहुल राम पिवाल हे या हल्ल्यात गंभीर जखमी झाले आहेत.
पोलिसांनी दिलेल्या माहितीनुसार, 29 जून रोजी रात्री साडेदहा वाजण्याच्या सुमारास पत्रा चाळ परिसरात फिर्यादी यांच्या पत्नी आणि मुलीला तीन तरुणी मारहाण करत होत्या. हा वाद सोडविण्यासाठी सुभाष संगेला गेले असता तेथे अनिकेत चांदणे उपस्थित होता. त्याने फिर्यादीला शिवीगाळ करत “माझ्या मैत्रिणीला का मारता?” असे म्हणत आपल्या साथीदारांना फोन करून घटनास्थळी बोलावले.
काही वेळातच आरोपींचे टोळके तेथे पोहोचले. त्यांनी दगड, लाथाबुक्क्या आणि धारदार शस्त्रांनी फिर्यादी व त्यांच्या नातेवाईकांवर हल्ला चढवला. या हल्ल्यात राहुल राम पिवाल यांच्या डोक्यात कोयत्याने वार करण्यात आला. त्यांना वाचवण्यासाठी आलेल्या कुटुंबीयांनाही आरोपींनी मारहाण केली.
जखमी राहुल पिवाल यांना उपचारासाठी तातडीने ससून रुग्णालयात दाखल करण्यात आले. या प्रकरणाचा पुढील तपास खडकी पोलीस करत असून फरार आरोपींचा शोध सुरू आहे.
