पुणे: पुण्यात वाढत्या गुन्हेगारीला आळा घालण्यासाठी पुणे पोलिसांनी कारवाईचा वेग वाढवला आहे. शहरात पायी गस्तीसह विविध उपाययोजना राबविण्यात येत असून, गुन्हेगार आणि त्यांना आर्थिक मदत करणाऱ्यांविरोधात कठोर पावले उचलली जात आहेत. याच मोहिमेअंतर्गत पोलिसांनी सिंहगड कॅम्पस परिसरातील बेकायदेशीर ‘मातोश्री हॉटेल’वर बुलडोझर कारवाई केली.
पोलिसांनी दिलेल्या माहितीनुसार, भारती विद्यापीठ पोलीस ठाण्यात दाखल असलेल्या मकोका प्रकरणातील फरार आरोपी मनोज पाडळे आणि त्याच्या टोळीला या हॉटेलमधून आर्थिक मदत मिळत असल्याची माहिती तपासादरम्यान समोर आली होती. त्यानंतर पोलिसांनी संबंधित शासकीय यंत्रणांच्या मदतीने हॉटेलवर कारवाई केली.
बुलडोझरच्या सहाय्याने बेकायदेशीर बांधकाम पाडून संपूर्ण हॉटेल जमीनदोस्त करण्यात आले. गुन्हेगारीला आर्थिक पाठबळ देणाऱ्या व्यक्ती आणि व्यवसायांवर कठोर कारवाई करण्याचा संदेश या मोहिमेतून देण्यात आल्याचे पोलिसांनी सांगितले.
दरम्यान, पुणे शहरात अलीकडच्या काळात विविध प्रकारच्या गुन्ह्यांमध्ये वाढ झाल्याने पोलिसांनी पायी गस्त वाढवली आहे. तसेच अवैध धंदे, गुन्हेगारांचे अड्डे आणि त्यांना मदत करणाऱ्या घटकांवर सातत्याने कारवाई सुरू आहे.
पुणे पोलिसांनी नागरिकांनाही संशयास्पद हालचाली किंवा गुन्हेगारीशी संबंधित माहिती तातडीने पोलिसांना देण्याचे आवाहन केले आहे. शहरातील कायदा आणि सुव्यवस्था कायम राखण्यासाठी अशा प्रकारच्या कारवाया पुढेही सुरू राहणार असल्याचे पोलिसांकडून स्पष्ट करण्यात आले आहे.
