पुणे: पुणेकरांसाठी दिलासादायक बातमी समोर आली आहे. लोहगाव विमानतळापर्यंत थेट मेट्रो सेवा उपलब्ध करून देण्यासाठी कल्याणीनगर मेट्रो स्थानकापासून विमानतळापर्यंत नवीन मेट्रो मार्ग उभारण्याचा निर्णय घेण्यात आला आहे. केंद्रीय हवाई वाहतूक राज्यमंत्री आणि पुण्याचे खासदार मुरलीधर मोहोळ यांच्या उपस्थितीत झालेल्या बैठकीत हा महत्त्वाचा निर्णय घेण्यात आला.
महा मेट्रोने या मार्गाची व्यवहार्यता तपासल्यानंतर त्याला मंजुरी देण्यात आली आहे. सध्या पुणे विमानतळाला थेट मेट्रोची सुविधा नसल्यामुळे प्रवाशांना येरवडा किंवा इतर मेट्रो स्थानकांवर उतरून पुढील प्रवास टॅक्सी किंवा अन्य वाहनांनी करावा लागतो. त्यामुळे वेळ आणि खर्च दोन्ही वाढतात. नवीन मार्गामुळे ही अडचण दूर होण्याची अपेक्षा आहे.
सध्या पुणे मेट्रोची लाइन 1 (पीसीएमसी ते स्वारगेट) आणि लाइन 2 (वनाझ ते रामवाडी) या दोन मार्गांवर सेवा सुरू आहे. कल्याणीनगर स्थानक हे लाइन 2 वर असून सिव्हिल कोर्ट स्थानकावर लाइन 1 आणि लाइन 2 यांच्यात इंटरचेंजची सुविधा आहे. त्यामुळे शहराच्या विविध भागांतील प्रवाशांना विमानतळापर्यंत सहज पोहोचता येणार आहे.
याशिवाय, प्रस्तावित लाइन 3 (हिंजवडी ते शिवाजीनगर) आणि लाइन 4 (खडकवासला ते खराडी) या मार्गांनाही कल्याणीनगर स्थानकाशी जोडण्याची योजना आहे. त्यामुळे भविष्यात पुण्यातील चारही मेट्रो मार्गांवरून लोहगाव विमानतळापर्यंत थेट आणि सुलभ प्रवास शक्य होणार आहे.
दरम्यान, बैठकीत वाहतूक कोंडी कमी करण्यासाठी पौड फाटा ते वनदेवी मंदिर आणि कचरा डेपोपासून चांदणी चौक मेट्रो स्थानकापर्यंत डबल डेकर उड्डाणपूल उभारण्याचे निर्देशही देण्यात आले. तसेच शेवळेवाडी-हडपसर-कात्रज मेट्रो मार्गाचा चांदणी चौक-वाकडपर्यंत विस्तार करण्यासाठी सविस्तर प्रकल्प अहवाल तयार करण्याच्या सूचनाही देण्यात आल्या आहेत.
