मुंबई: बडतर्फ सहाय्यक पोलीस निरीक्षक सचिन वाझे यांच्या जामीन अर्जावर मुंबई उच्च न्यायालयात तब्बल तीन तास सुनावणी झाली. न्यायमूर्ती गिरीश कुलकर्णी आणि न्यायमूर्ती डॉ. नीला गोखले यांच्या खंडपीठासमोर झालेल्या सुनावणीदरम्यान वाझे यांच्या आर्थिक स्थिती, महागड्या गाड्या आणि त्यांच्या कथित वापराबाबत न्यायालयाने प्रश्न उपस्थित केले. एका पोलीस अधिकाऱ्याच्या उत्पन्नाच्या तुलनेत त्याच्याकडे असलेल्या संपत्तीबाबत न्यायालयाने आश्चर्य व्यक्त केले. सकाळच्या सत्रातील सुनावणीनंतर कामकाज तहकूब करण्यात आले असून, दुपारच्या सत्रात जामीन अर्जावर पुढील सुनावणी होणार आहे.
सुनावणीदरम्यान सचिन वाझे वापरत असलेल्या मर्सिडीज गाडीचा मुद्दा उपस्थित झाला. न्यायमूर्ती गिरीश कुलकर्णी यांनी ही गाडी कुठून आली आणि तिचा वापर अधिकृत नोंदीत आहे का, अशी विचारणा केली. यावर सॉलिसिटर जनरल यांनी एका एपीआयच्या मालकीची मर्सिडीज असल्याचे सांगितले. त्यावर न्यायालयाने एका सहाय्यक पोलीस निरीक्षकाकडे मर्सिडीज असणे ही पोलीस प्रशासनासाठी गंभीर बाब असल्याचे निरीक्षण नोंदवले.
न्यायालयासमोर एका साक्षीदाराच्या जबाबाचाही उल्लेख करण्यात आला. त्यानुसार वाझे हे मर्सिडीज गाडीने मुंबई पोलीस आयुक्त कार्यालयात येत असत आणि पुढे ‘वर्षा’ या मुख्यमंत्र्यांच्या निवासस्थानी जात असल्याचा दावा करण्यात आला.
यावेळी न्यायालयाने वाझे यांच्या मासिक पगाराबाबतही विचारणा केली. वाझे यांचे सध्याचे मासिक उत्पन्न सुमारे ९० हजार रुपये असल्याचे वकिलांकडून सांगण्यात आले. त्यानंतर न्यायमूर्ती डॉ. नीला गोखले यांनी वाझे यांच्या मालकीच्या किंवा वापरातील वाहनांची माहिती न्यायालयात वाचून दाखवली. त्यांच्याकडे बीएमडब्ल्यू आणि मर्सिडीजसह पाच महागड्या गाड्या असल्याचे सुनावणीदरम्यान नमूद करण्यात आले.
मर्यादित सरकारी वेतन असताना एवढ्या महागड्या गाड्या आणि संपत्तीची उभारणी कशी झाली, याबाबत न्यायालयाने सवाल उपस्थित केला. या संपत्तीचा स्रोत, वाहनांची मालकी आणि संबंधित आर्थिक व्यवहारांचा तपास याबाबत पुढील सुनावणीत काय भूमिका मांडली जाते, याकडे आता लक्ष लागले आहे.
