पुणे : पुणे शहरामध्ये विनापरवाना आणि बेकायदेशीर बाईक टॅक्सी सेवा सुरू ठेवल्यामुळे रॅपिडो कंपनीच्या अडचणीत मोठी वाढ झाली आहे. रॅपिडोची मूळ कंपनी असलेल्या ‘रोपेन ट्रान्सपोर्ट प्रा. लि.’ विरोधात विश्रांतवाडी पोलीस ठाण्यात अधिकृतपणे गुन्हा दाखल करण्यात आला आहे. पुणे प्रादेशिक परिवहन कार्यालयाच्या पथकाने ही धडक कारवाई केली असून, त्यामुळे संपूर्ण परिवहन वर्तुळात खळबळ उडाली आहे.
या कारवाईमागील पार्श्वभूमी पाहता, जिल्हाधिकारी तथा प्रादेशिक परिवहन प्राधिकरणाचे अध्यक्ष जितेंद्र डूडी यांनी यापूर्वीच रॅपिडोचा अ‍ॅग्रीगेटर परवाना फेटाळला होता. तसेच, जोपर्यंत कायदेशीर परवानगी मिळत नाही, तोपर्यंत शहरात कोणतीही सेवा सुरू ठेवू नये, असे स्पष्ट निर्देश दिले होते. मात्र, या आदेशाचे उल्लंघन करून बेकायदेशीर सेवा सुरूच ठेवण्यात आल्याचे समोर आले.
कारवाई कशी झाली, हे पाहण्यासाठी आरटीओ अधिकाऱ्यांनी एका अनोख्या युक्तीचा वापर केला. मोटार वाहन निरीक्षक प्रसाद सुरवसे यांनी स्वतः रॅपिडो ॲपवरून येरवडा ते कोथरूड बस डेपो अशी एक बाईक टॅक्सी राईड बूक केली. ठरल्याप्रमाणे राईडसाठी एक दुचाकी आली, जी प्रत्यक्षात विना-परिवहन अर्थात नॉन-ट्रान्सपोर्ट श्रेणीत नोंदणीकृत असलेली पेट्रोल बाईक होती. ती पूर्णपणे नियमांच्या विरुद्ध होती.
या स्टिंग ऑपरेशननंतर आरटीओ पथकाने तात्काळ कारवाई करत ती दुचाकी जप्त केली. त्यानंतर विश्रांतवाडी पोलीस ठाण्यात कंपनीविरोधात फिर्याद देण्यात आली. पोलिसांनी या प्रकरणी भारतीय न्याय संहिता (BNS) कलम 318(8), मोटार वाहन कायदा तसेच माहिती तंत्रज्ञान (IT) कायद्याच्या विविध कलमांनुसार गुन्हा नोंदवला आहे. प्रशासनाने यापूर्वीच सेवा बंद करण्याचे आदेश दिल्यानंतरही नियमांची पायमल्ली केल्यामुळे आता कंपनीवर कायदेशीर कारवाई करण्यात आली आहे. या कारवाईमुळे शहरात विनापरवाना सेवा चालवणाऱ्या इतर कंपन्यांचेही धाबे दणाणले आहेत
