तेलंगणा : हैदराबाद येथील एमव्हीएसआर इंजिनिअरिंग कॉलेजमध्ये दांडिया उत्सवादरम्यान एक अत्यंत दुर्दैवी घटना घडली आहे. आदिबटला परिसरातील नादेरगुल कॅम्पसमध्ये हा अपघात झाला. शनिवारी संध्याकाळी सर्व विद्यार्थी उत्साहात दांडिया खेळत असताना, अचानक स्टेजवरील दिव्यांची मोठी लोखंडी चौकट थेट विद्यार्थ्यांच्या अंगावर कोसळली.
या भीषण दुर्घटनेत पहिल्या वर्षात शिकणाऱ्या सोना नावाच्या तरुणीचा जागीच मृत्यू झाला, तर 17 पेक्षा जास्त विद्यार्थी गंभीर जखमी झाले. अचानक घडलेल्या या प्रकारामुळे संपूर्ण कॉलेज कॅम्पसमध्ये एकच धावपळ उडाली आणि विद्यार्थी भयभीत झाले. घटनेची माहिती मिळताच कॉलेजचे कर्मचारी व इतर विद्यार्थ्यांनी तातडीने धाव घेऊन मदतकार्य केले आणि सर्व जखमींना उपचारासाठी तातडीने जवळच्या रुग्णालयात दाखल केले.
स्थानिक पोलिसांनी दिलेल्या माहितीनुसार, या उत्सवासाठी मैदानावर एक विशेष मंच उभारण्यात आला होता. या मंचावर सजावटीचे दिवे लावण्यासाठी एक जड धातूचा सांगाडा तयार करण्यात आला होता, जो दुर्घटनेच्या वेळी अचानक मुळापासून कोसळला. आदिबटला पोलीस ठाण्याचे निरीक्षक एस. रमेश यांनी सांगितले की, जखमी विद्यार्थ्यांना वेगवेगळ्या रुग्णालयात उपचारासाठी हलवण्यात आले असून पोलीस या संपूर्ण प्रकरणाची सखोल चौकशी करत आहेत.
या दुर्घटनेचा एक व्हिडिओ देखील सोशल मीडियावर मोठ्या प्रमाणावर व्हायरल होत आहे. या घटनेची गंभीर दखल घेत तेलंगणाचे मुख्यमंत्री ए. रेवंत रेड्डी यांनी तीव्र दु:ख व्यक्त केले आहे. तसेच, या दुर्दैवी घटनेस जबाबदार असणाऱ्या दोषी व्यक्तींवर तात्काळ आणि कठोर कारवाई करण्याचे स्पष्ट निर्देश त्यांनी पोलिसांना दिले आहेत. मुख्यमंत्र्यांनी मृत विद्यार्थिनीच्या शोकाकुल कुटुंबा प्रति आपल्या मनःपूर्वक शोकसंवेदना व्यक्त केल्या आहेत, तसेच सर्व जखमी विद्यार्थ्यांना सर्वोत्तम वैद्यकीय उपचार मिळतील याची खात्री करण्याचे आदेशही प्रशासनाला दिले आहेत
