पुणे : पुण्यातील प्रसिद्ध मुकुंदनगर परिसरात घडलेल्या पायल झांबरे आत्महत्या प्रकरणात एक महत्त्वाची माहिती समोर आली आहे. या प्रकरणातील मुख्य आरोपी पती अक्षय झांबरे, सासू मंगल झांबरे आणि सासरे अरविंद झांबरे यांच्या पोलीस कोठडीत न्यायालयाने 2 दिवसांची वाढ केली आहे. पुणे जिल्हा सत्र न्यायालयाच्या या निर्णयामुळे तिन्ही आरोपींना आता 9 नोव्हेंबरपर्यंत पोलीस कोठडीत राहावे लागणार आहे.
मिळालेल्या माहितीनुसार, स्वारगेट पोलीस ठाण्याच्या हद्दीत राहणाऱ्या 34 वर्षीय पायल झांबरे यांनी 2 ऑक्टोबर रोजी राहत्या घरी गळफास घेऊन आपली जीवनयात्रा संपवली होती. सासरच्या लोकांकडून होणाऱ्या शारीरिक व मानसिक त्रासाला कंटाळून त्यांनी हे पाऊल उचलल्याचा आरोप आहे. या घटनेनंतर पायल यांचे भाऊ ऋषिकेश पवार यांनी दिलेल्या तक्रारीवरून स्वारगेट पोलिसांनी पती, सासू, सासरे आणि नणंद यांच्याविरुद्ध आत्महत्येस प्रवृत्त केल्याचा गुन्हा नोंदवला होता.
पोलीस कोठडीची मुदत संपल्यानंतर पोलिसांनी तिन्ही आरोपींना न्यायालयात हजर केले होते. तपासादरम्यान पोलिसांनी आरोपींकडून सुमारे 35 तोळे सोने हस्तगत केले आहे. न्यायालयाने आरोपींची कोठडी वाढवून दिल्याने पोलिसांना आता पुढील चौकशीसाठी वेळ मिळाला आहे.
या गुन्ह्याचा अधिक सखोल तपास करण्यासाठी पोलिसांना पायल यांच्या मोबाईल फोनचे डिजिटल विश्लेषण करायचे आहे. त्यासोबतच या प्रकरणात इतर कोणाचा प्रत्यक्ष वा अप्रत्यक्ष सहभाग आहे का, याचाही शोध घेतला जात आहे. तसेच घटनेनंतर फरार असलेल्या नणंदेचा (चौथ्या आरोपीचा) पोलीस शोध घेत आहेत. मोबाईलमधील डेटा आणि पोलिसांच्या पुढील तपासातून या प्रकरणात काय नवीन तथ्ये बाहेर येतात, याकडे आता सर्वांचे लक्ष लागले आहे.
