पुणे: पुणे जिल्हा परिषदेच्या प्राथमिक शिक्षण विभागाकडून सर्व जिल्हा परिषद शाळांमध्ये एका विशेष उपक्रमाचे आयोजन करण्यात आले आहे. या उपक्रमानुसार दिवाळी पाडव्याच्या शुभमुहूर्तावर सर्व शाळांमध्ये माजी विद्यार्थ्यांचा मेळावा भरवला जाणार आहे.
या कार्यक्रमाचा मुख्य उद्देश माजी विद्यार्थ्यांना आपल्या जुन्या शाळेत पुन्हा एकत्र आणणे हा आहे. याद्वारे विद्यार्थ्यांना बालपणीच्या आठवणींना उजाळा देण्याची, जुन्या मित्रांना भेटण्याची आणि आपल्या शिक्षकांशी संवाद साधण्याची सुवर्णसंधी मिळणार आहे. याशिवाय, सध्या शाळेत शिकणाऱ्या विद्यार्थ्यांच्या सर्वांगीण विकासासाठी आणि त्यांच्या उज्ज्वल भविष्यासाठी माजी विद्यार्थ्यांनी मार्गदर्शन करावे, असा प्रशासनाचा मानस आहे.
शाळेच्या आणि विद्यार्थ्यांच्या प्रगतीसाठी माजी विद्यार्थ्यांनी वस्तूंच्या स्वरूपात किंवा अन्य मार्गानी शक्य ती मदत करावी, असे आवाहनही या उपक्रमाद्वारे करण्यात आले आहे.
पुणे जिल्हा परिषदेच्या प्राथमिक शिक्षणाधिकारी ललिता दहीतुले यांनी या संदर्भात परिपत्रक जारी केले आहे. त्यांनी जिल्ह्यातील सर्व पंचायत समित्यांच्या गटशिक्षणाधिकाऱ्यांना या कार्यक्रमाविषयी सूचना दिल्या आहेत. आपल्या स्तरावरून या उपक्रमाला व्यापक प्रसिद्धी द्यावी, तसेच सर्व शाळांचे मुख्याध्यापक आणि शाळा व्यवस्थापन समित्यांना या मेळाव्याचे आयोजन करण्याचे निर्देश द्यावेत, असे आदेश देण्यात आले आहेत.
दिवाळी पाडव्याच्या दिवशी शाळांमध्ये हा मेळावा यशस्वीरीत्या पार पाडल्यानंतर, त्याचा सविस्तर अहवाल 12 नोव्हेंबर 2026 पर्यंत शिक्षण विभागाकडे सादर करायचा आहे. या निर्णयाची प्रत जिल्हा परिषदेचे अध्यक्ष, उपाध्यक्ष तथा शिक्षण सभापती आणि मुख्य कार्यकारी अधिकारी यांना माहितीसाठी सादर करण्यात आली आहे.
जिल्हा परिषदेच्या या उपक्रमामुळे माजी विद्यार्थी आणि शाळा यांच्यात एक नवीन नाते निर्माण होईल आणि शाळांच्या विकासाला गती मिळेल, अशी अपेक्षा व्यक्त केली जात आहे.
