राहुलकुमार अवचट
पुणे :पुणे-सोलापूर या राष्ट्रीय महामार्गावरून जाणाऱ्या यवत परिसरातील बंद पडलेले पथदिवे अखेर पूर्ववत करण्यात आले आहेत. ऐन सणासुदीच्या दिवसांत हे दिवे सुरू झाल्याने स्थानिक नागरिकांनी आणि वाहनधारकांनी सुटकेचा श्वास सोडला आहे.
काही दिवसांपूर्वी यवत परिसरात झालेल्या अवकाळी पावसामुळे महामार्गाच्या विद्युत व्यवस्थेत अचानक तांत्रिक बिघाड झाला होता. यामुळे रस्त्याच्या दोन्ही बाजूंना बसवलेले 80 हून अधिक पथदिवे एकाच वेळी बंद पडले. दिवाळीच्या काळात संपूर्ण गाव दिव्यांच्या रोषणाईने उजळून निघाले असताना, महामार्गावर मात्र तीव्र अंधाराचे साम्राज्य पसरले होते.
या परिस्थितीमुळे अपघातांचा धोका वाढला होता आणि रात्रीच्या वेळी ये-जा करणाऱ्या वाहनचालकांची मोठी अडचण होत होती. संबंधित कंत्राटदाराकडून कोणतीही त्वरित दुरुस्ती न झाल्यामुळे स्थानिक नागरिकांमध्ये तीव्र असंतोष निर्माण झाला होता.
नागरिकांची ही गैरसोय लक्षात घेऊन अखेर यवत ग्रामपंचायत आणि महावितरण कंपनीने पुढाकार घेतला. दोन्ही प्रशासनांनी एकत्र येत तातडीने बिघाड शोधून काढला आणि आवश्यक ती दुरुस्ती केली. त्यांच्या या संयुक्त प्रयत्नांमुळे अनेक दिवसांपासून बंद असलेले सर्व दिवे पुन्हा सुरू झाले आहेत.
महामार्गावर पुन्हा एकदा प्रकाश परतल्याने यवत परिसरातील रस्ते उजळून निघाले आहेत. स्थानिक प्रशासनाने वेळोवेळी दाखवलेल्या या तत्परतेमुळे सर्व स्तरातून समाधान व्यक्त केले जात आहे.
