उरुळी कांचन, ता. 8: डाळिंब (ता. दौंड) येथून ‘उरुळी कांचनला जाऊन येतो’, असे सांगून घराबाहेर पडलेल्या 35 वर्षीय तरुणाचा मृतदेह सहा दिवसांनी डाळिंब येथील लेचरूड वस्ती परिसरातील एका शेतकऱ्याच्या विहिरीत गुरुवारी (ता. 8) दुपारी तीन वाजण्याच्या सुमारास आढळून आला. मृतदेहाच्या पाठीला सुमारे 15 ते 16 किलो वजनाचा दगड बांधलेला होता. तसेच मृतदेह तारेने बांधण्यात आला होता. त्यामुळे हा आत्महत्येचा प्रकार नसून खून असण्याचा संशय व्यक्त केला जात आहे.
मृत तरुणाचे नाव भीमाशंकर धोंडीबा खंडागळे असे आहे. मिळालेल्या माहितीनुसार, भीमाशंकर हे फुरसुंगी येथे पत्नी व मुलांसह राहत होते. २ ऑक्टोबर रोजी दुपारी ते डाळिंब येथे आई नंदा खंडागळे यांना भेटण्यासाठी आले होते. घराचे बांधकाम पाहिल्यानंतर काही वेळ आराम करून सायंकाळी सहाच्या सुमारास ‘उरुळी कांचनला जाऊन येतो’, असे सांगून ते घराबाहेर पडले. मात्र, त्यानंतर ते घरी परतलेच नाहीत. कुटुंबीयांनी डाळिंब, उरुळी कांचन परिसर तसेच नातेवाईकांकडे त्यांचा शोध घेतला. मात्र, पाच दिवस उलटूनही त्यांचा ठावठिकाणा लागला नाही. त्यामुळे त्यांचे अपहरण झाले असावे, अशी शक्यता व्यक्त करत त्यांच्या आईने यवत पोलीस ठाण्यात तक्रार दाखल केली होती.
View this post on Instagram
दरम्यान, गुरुवारी दुपारी तीनच्या सुमारास लेचरूड वस्ती परिसरातील एका शेतकऱ्याच्या विहिरीत भीमाशंकर यांचा मृतदेह आढळून आला. त्यांनी तात्काळ याची माहिती पोलिसांना दिली. त्यानंतर कस्तुरी प्रतिष्ठानचे अध्यक्ष मिलिंद मेमाणे, रुग्णवाहिका चालक संतोष झोंबडे, माऊली लाड आणि रतन चव्हाण यांनी घटनास्थळी धाव घेतली.विहीर खोल असल्याने तसेच मृतदेहाची अवस्था खराब झाल्याने तो बाहेर काढणे आव्हानात्मक होते. नातेवाईकांनी नाकाला रुमाल लावून काही अंतरावर थांबणे पसंत केले; मात्र कस्तुरी प्रतिष्ठानच्या कार्यकर्त्यांनी जीवाची बाजी लावत विहिरीत उतरून मृतदेह बाहेर काढला. पाठीला दगड बांधलेला आणि शरीर तारेने बांधलेल्या अवस्थेत आढळल्याने या घटनेचे गूढ अधिकच वाढले आहे.
भीमाशंकर यांचा मृत्यू नेमका कशामुळे झाला? त्यांना विहिरीत ढकलण्यात आले का? त्यांच्या पाठीला एवढा मोठा दगड कोणी आणि का बांधला? मृतदेह तारेने का बांधण्यात आला? या प्रश्नांची उत्तरे आता पोलिसांच्या तपासातून समोर येणार आहेत. या घटनेची माहिती मिळताच यवत पोलिसांनी घटनास्थळी धाव घेतली असून, मृतदेह बाहेर काढून पुढील कायदेशीर प्रक्रिया सुरू केली आहे. शवविच्छेदन अहवालानंतर मृत्यूचे नेमके कारण स्पष्ट होणार आहे. दरम्यान, पोलिसांकडून या प्रकरणातील सर्व शक्यता तपासल्या जात आहेत.
