पुणे : राष्ट्रवादी काँग्रेस शरदचंद्र पवार पक्षाच्या खासदार सुप्रिया सुळे यांच्या जावयाशी संबंधित एका कंपनीला सुमारे 1200 एकर शासकीय जमीन वाटप केल्याचा मुद्दा सध्या राजकीय वर्तुळात चर्चेत आला आहे. या संपूर्ण व्यवहारावरून ज्येष्ठ सामाजिक कार्यकर्त्या अंजली दमानिया यांनी राज्य सरकारवर आणि प्रशासकीय प्रक्रियेवर जोरदार टीका करत काही प्रश्न उपस्थित केले आहेत.या आरोपांनंतर सुप्रिया सुळे यांनी पक्षाच्या एका मेळाव्यात बोलताना आपली भूमिका स्पष्ट केली.
सुप्रिया सुळे म्हणाल्या, “माझे जावई काय व्यवसाय किंवा काम करतात, हा पूर्णपणे त्यांचा वैयक्तिक विषय आहे. त्यावर मी कसे बोलू शकते?” असा प्रतिप्रश्न करत त्यांनी या वादावर आपली पहिली प्रतिक्रिया दिली.ग्रीन एनर्जी पार्क प्रकल्पासाठी ही 1200 एकर सरकारी जमीन खासगी कंपनीला देताना कोणतीही जाहीर निविदा का काढली नाही, असा थेट सवाल दमानिया यांनी केला आहे.
जर या जमिनीसाठी खुली स्पर्धा झाली असती, तर सरकारला अधिक महसूल किंवा भाडे मिळाले असते, असा दावा त्यांनी केला. तसेच, जून महिन्यात ही जमीन सार्वजनिक-खासगी भागीदारी तत्त्वावर देण्याचे ठरले असताना, अवघ्या तीन महिन्यांत म्हणजेच सप्टेंबर महिन्यात ती थेट एकाच कंपनीला देण्याचा निर्णय कसा झाला? या बदलाचे कोणतेही स्पष्ट कारण सरकारी निर्णयात दिलेले नाही, असेही दमानिया यांनी निदर्शनास आणून दिले.
