शिक्रापूर, ता. 31 : बस बाजूला घेतल्याच्या कारणावरून झालेल्या वादातून चार जणांनी बसचालकाला शिवीगाळ करत बेदम मारहाण केल्याची घटना शिक्रापूर येथील मलठण फाट्याजवळ पुणे-अहिल्यानगर महामार्गावर शुक्रवारी (ता. 30) मध्यरात्री घडली. या मारहाणीत बसचालक दिनकर कुबेर उंबरकर (वय 29, रा. सणसवाडी, ता. शिरूर) हे जखमी झाले असून, त्यांच्या गळ्यातील सुमारे दीड तोळ्याची सोन्याची चैनही हरवल्याचे त्यांनी फिर्यादीत म्हटले आहे.
पोलिसांनी दिलेल्या माहितीनुसार, दिनकर उंबरकर हे खासगी बस चालवून कुटुंबाचा उदरनिर्वाह करतात. शुक्रवारी रात्री साडेअकराच्या सुमारास ते याझाकी कंपनीतील कामगारांना घेऊन जात होते. मध्यरात्री सुमारे 12 वाजून 10 मिनिटांनी मलठण फाट्याजवळील कॅनल परिसरात त्यांनी आपली बस (एमएच 12 झेडयू 9334) रस्त्याच्या कडेला घेतली. त्याचवेळी पुण्याच्या दिशेने आलेली इर्टिगा कार (एमएच 12 एक्सएम 5030) मधील चार जण खाली उतरले. बसमुळे कार बाजूला दाबली गेल्याचा आरोप करत त्यांनी उंबरकर यांच्याशी वाद घातला.
त्यानंतर चौघांनी उंबरकर यांना बसमधून खाली ओढून शिवीगाळ व दमदाटी केली. दोघांनी त्यांना पकडून ठेवले, तर एकाने त्यांच्या डोक्यात दगडाने मारहाण केली. अन्य एकाने हाताने व लाथाबुक्क्यांनी मारहाण केली. हा प्रकार पाहून बसमधील कामगार ओंकार संतोष गुरव हे मदतीला धावले असता त्यांनाही मारहाण करण्यात आली. या झटापटीत उंबरकर यांच्या गळ्यातील दीड तोळ्याची सोन्याची चैन हरवल्याचे फिर्यादीत नमूद आहे.
याप्रकरणी ताराचंद भाऊसाहेब जोगदंड, उमेश हिवाळे, सचिन खंडागळे आणि रोहन शिवाजी खंडागळे (सर्व रा. सोमेश्वरवाडी, पाषाण, पुणे) यांच्याविरुद्ध शिक्रापूर पोलीस ठाण्यात गुन्हा दाखल करण्यात आला आहे. पुढील तपास सहायक फौजदार भोते करीत आहेत.
