पुणे : तोरणा किल्ल्यावर फिरण्यासाठी निघालेल्या तिघांवर पाबे घाटात भयंकर घडलं. त्यांची कार अचानक घसरून सुमारे 150 फूट खोल दरीत कोसळली. मात्र, दरीतील एका झाडाला कार अडकल्याने मोठा अनर्थ टळला. या घटनेत कारमधील तिघे जखमी झाले असून त्यांना उपचारासाठी पुण्यात पाठवण्यात आले आहे.
मिळालेल्या माहितीनुसार, हडपसर येथून तिघे जण तोरणा किल्ला पाहण्यासाठी कारने निघाले होते. राजगड तालुक्यातील पाबे घाटातून जात असताना चढावावर अचानक कार बंद पडली. त्याचवेळी पाऊस आणि रस्त्यावरील ओलाव्यामुळे वाहनावरील नियंत्रण सुटले. कार मागे घसरत दरीच्या दिशेने गेली आणि खोल दरीत कोसळली.
सुमारे 150 फूट खाली गेल्यानंतर कार एका झाडाला अडकली. त्यामुळे वाहन थेट खोलवर जाण्यापासून थांबले आणि तिघांचे प्राण वाचले. अपघातात कारचे मोठे नुकसान झाले आहे. मात्र, तिघेही प्रवासी बचावल्याने घटनास्थळी काहीसा दिलासा मिळाला.
अपघात घडला त्यावेळी त्याच मार्गावरून मागून काही पर्यटक येत होते. त्यांनी प्रसंगाचे गांभीर्य ओळखून तातडीने मदत सुरू केली. दोरीच्या साहाय्याने कारमध्ये अडकलेल्या तिन्ही प्रवाशांना बाहेर काढण्यात आले. त्यानंतर स्थानिक बचाव पथकाला घटनेची माहिती देण्यात आली.
माहिती मिळताच स्थानिक रेस्क्यू टीम घटनास्थळी पोहोचली. जखमींना तातडीने वेल्हे प्राथमिक आरोग्य केंद्रात नेण्यात आले. तेथे प्राथमिक उपचार केल्यानंतर पुढील उपचारांसाठी त्यांना पुण्यात हलवण्यात आले.
