शिक्रापूर : शिरूर तालुक्यातील डिंग्रजवाडी येथील कंपनीतून सुमारे 5 लाख रुपये किमतीचे सर्व्हे मशिन चोरी करणाऱ्या टोळीचा शिक्रापूर पोलिसांनी छडा लावला आहे. या प्रकरणाचा तपास करत पोलिसांनी दोन आरोपींना वेगवेगळ्या ठिकाणांहून अटक केली. यातील एका आरोपीला हरियाणा राज्यातून, तर दुसऱ्याला पुण्यातील विश्रांतवाडी परिसरातून ताब्यात घेण्यात आले. त्यांच्याकडून चोरीच्या मुद्देमालापैकी 3 लाख रुपये किमतीचे साहित्य जप्त करण्यात आले आहे.
डिंग्रजवाडी येथील इगवुड प्रा. लि. स्कॅलार स्पेसेस या कंपनीत जमीन मोजणीसाठी वापरण्यात येणारे सर्व्हे मशिन ठेवण्यात आले होते. चोरट्यांनी कंपनीतून हे मशिन चोरून नेले होते. या घटनेनंतर संग्राम शामराव मोरे (वय 44, रा. चिखली प्राधिकरण, चिंचवड, पुणे) यांनी शिक्रापूर पोलीस ठाण्यात तक्रार दाखल केली. त्यानुसार भारतीय न्याय संहिता कलम 334(1), 305, 317(2), 3(5) अंतर्गत गुन्हा नोंदवण्यात आला.
या चोरीचा तपास पोलीस निरीक्षक चंद्रशेखर यादव यांच्या मार्गदर्शनाखाली सुरू करण्यात आला. तांत्रिक माहितीचे विश्लेषण आणि गोपनीय सूत्रांकडून मिळालेल्या माहितीनंतर पोलिसांनी संशयितांचा शोध घेतला. त्यातून हरी किशन जाटो (वय 24, रा. जोधपूर, राजस्थान) याला हरियाणातून, तर अफाकजुद्दीन मुंताजिमुद्दीन काझी (वय 36, रा. खडकी) याला विश्रांतवाडी, पुणे येथून अटक करण्यात आली. चौकशीदरम्यान दोघांनीही चोरीची कबुली दिल्याची माहिती पोलिसांनी दिली.
दरम्यान, या आरोपींनी यापूर्वी अशाच प्रकारच्या अन्य चोरीच्या घटना केल्या आहेत का, याचा पोलीस तपास करत आहेत. पुणे ग्रामीणचे पोलीस अधीक्षक संदिपसिंह गिल्ल, अपर पोलीस अधीक्षक डॉ. शुभम कुमार आणि शिरूरचे उपविभागीय पोलीस अधिकारी रविंद्र भोसले यांच्या मार्गदर्शनाखाली ही कारवाई करण्यात आली. पुढील तपास पोलीस हवालदार अजित इंगवले करीत आहेत.
