पुणे : पुणे शहरात लॅपटॉप आणि मोबाईल चोरीच्या घटनांमध्ये सहभागी असल्याच्या आरोपावरून दोन आंतरराज्यीय आरोपींना गुन्हे शाखेच्या दरोडा व वाहनचोरी विरोधी पथकाने अटक केली आहे. त्यांच्याकडून 8 लॅपटॉप आणि 8 मोबाईल फोन असा एकूण 5 लाख 50 हजार रुपयांचा मुद्देमाल जप्त करण्यात आला आहे. या कारवाईमुळे शहरातील 8 चोरीच्या गुन्ह्यांची उकल झाली आहे.
31 ऑक्टोबर 2026 रोजी दरोडा व वाहनचोरी विरोधी पथक क्रमांक 2 चे अधिकारी आणि कर्मचारी शहरात गस्त घालत होते. त्यावेळी पोलीस हवालदार परेश सावंत आणि पोलीस अंमलदार प्रफुल्ल मोरे यांना दोन संशयित व्यक्तींबाबत माहिती मिळाली. या माहितीच्या आधारे पोलिसांनी कुमार मरीअप्पन (वय 33) आणि कृष्णा औलोडन (वय 25) या दोघांना ताब्यात घेतले.
दोन्ही आरोपी तामिळनाडू राज्यातील रहिवासी आहेत. त्यांच्याकडे सखोल चौकशी केली असता चोरीचे लॅपटॉप आणि मोबाईल फोन मिळून आले. पोलिसांनी हे सर्व साहित्य जप्त केले असून त्याची अंदाजे किंमत 5.50 लाख रुपये आहे.
हडपसर, खराडी आणि चंदननगरमधील गुन्हे उघड
या कारवाईत हडपसर पोलीस ठाण्यातील 1, खराडी पोलीस ठाण्यातील 5 आणि चंदननगर पोलीस ठाण्यातील 2 अशा एकूण 8 चोरीच्या गुन्ह्यांचा तपास उघडकीस आला आहे. या सर्व प्रकरणांची नोंद भारतीय न्याय संहितेच्या कलम 305 अंतर्गत करण्यात आली आहे.
ही कारवाई पोलीस उपनिरीक्षक संतोष तानवडे यांच्या मार्गदर्शनाखाली करण्यात आली. पथकात एएसआय कुरळे, पोलीस हवालदार परेश सावंत, महेश बारवकर तसेच पोलीस अंमलदार प्रफुल्ल मोरे आणि सचिन कांबळे यांचा समावेश होता. पोलीस निरीक्षक अंजुम बागवान यांनी या कारवाईची माहिती दिली. जप्त केलेल्या वस्तू आणि संबंधित गुन्ह्यांच्या अनुषंगाने पुढील तपास सुरू आहे.
